ახლა რატომ უნდო დავიჯერო თქვენი, როცა თავად მეუბნები, რომ ამდენი წელი მატყუებდი, ჟურნალისტი კი არა, თურმე პარტიული პროპაგანდისტი იყავი – ასე გამოეხმაურა ექსპერტი ირაკლი მელაშვილი გიორგი გაბუნიას განცხადებას.
„გუშინდლამდე, ჟურნალისტი კი არა პროპაგანდისტები ვიყავით ყველაო. დღეიდან აღარ ვიქნებითო! სასწაულია პირდაპირ!
წლები რომ გვიმტკიცებდით, რუსთავი 2 და “მთავარი არხი” დამოუკიდებელი ტელევიზიები ვართ, სიმართლეს მხოლოდ ჩვენ ვლაპარაკობთ, ყველაზე თავისუფალი ჟურნალიტები გვყავს და რომ გაჰყვიროდით, ვინც პარტიულ ტელევიზას გვეძახის ყველა ბიძინას ზებრები ხართო, იმას რა ვუყოთ? ანუ მართლები ყოფილან ხომ ის ადამიანები, რომლებსაც თქვენი დამოუკიდებლობის არ ჯეროდა და ნაცების ნების აღმსრულებლებად გვთლიდნენ? თურმე წლების განმავლობაში ამ არხების ჟურნალისტებმა იცოდნენ, რომ მახინჯ სისტემას ემსახურებოდნენ, სიმართლეს კი ლაპარაკობდნენ, პარტიულ მითითებებს ასრულებდნენ და ნაცების პროპაგანდას ემსახურებოდნენ, ამაზეც არაფერი ხომ? ბოდიშსაც არ მოუხდით თქვენს მაყურებელს? ასეთი არაფერი გამიგია! ახლა რატომ უნდო დავიჯერო თქვენი, როცა თავად მეუბნები, რომ ამდენი წელი მატყუებდი, ჟურნალისტი კი არა, თურმე პარტიული პროპაგანდისტი იყავი? რა შეგიშლის ხელს, რომ კიდევ მომატყუო, ან რატომ დავიჯერო რომ დღევანდელი სიტყვებიც ტყუილი არ არის და ისევ რომელიმე პარტიის სამსახურში არ დარჩი, ან პატრონის გამოცვლას არ აპირებ და მომავალში არ ჩადგები?!“ – წერს ირაკლი მელაშვილი.
შეგახსენებთ, რომ ტელეკომპანია „მთავარი არხის“ გენერალური დირექტორის მოვალეობის შემსრულებელმა გიორგი გაბუნიამ, გადაცემაში „შენი შუადღე“, არხზე განხორციელებულ ცვლილებებზე ისაუბრა. მისი თქმით, „მთავარ არხზე“ „ძირეული“ ცვლილებები განხორციელდა, რის შედეგადაც, მისივე განმარტებით, ახლა ის „ნაცების ტელევიზია“ აღარაა.
„სამწუხაროდ, „ნაცების“ ტელევიზიის იარლიყი ტყუილად არ გვქონდა. ახლა რაც შემიძლია ძალიან დიდი სიამოვნებით და ბედნიერებით ვთქვა, „ნაცების“ ტელევიზია აღარ ვართ ნამდვილად. ამას კიდევ წლები დასჭირდება, რომ ხალხმა დაიჯეროს ეს და დააფიქსიროს, უნდა უყურო ეთერს სისტემატურად, ნაცების ტელევიზია აღარ ვართ“, – თქვა გიორგი გაბუნიამ.