ამერიკის შეერთებული შტატების იუსტიციის დეპარტამენტის ვებ-გვერდზე ლობისტურ კომპანიებზე ახალი დოკუმენტები გამოქვეყნდა. ამჯერად საუბარია ტელეკომპანია “ფორმულას” მიერ დაქირავებული ლობისტური კომპანიის “ქორნერსთოუნ გავერმენთ ეფიარსის” გასული სამი თვის საქმიანობის შესახებ.
დოკუმენტებით ირკვევა, რომ კომპანიამ, მაისიდან აქტიურად დაიწყო ტელეკომპანია “ფორმულას” ლობირება და ლობიზმის ფარგლებში საქართველოში მიმდინარე მოვლენებზე ინფორმაცია მიაწოდა აშშ-ის კონგრესისა და აღმასრულებელი ხელისფულების წარმომადგენლებს, ამერიკულ მედიას, ანალიტიკურ ცენტრებსა და სხვა ორგანიზაციებს.
მომსახურებაში ლობისტური ჯგუფი ჯამში 420 000 დოლარს იღებს. დოკუმენტებით ირკვევა, რომ ტელეკომპანიამ მაისსა და აგვისტოში “ქორნერსთოუნ გავერმენთ ეფიარსს” დაახლოებით 110 000 დოლარი გადაუხადა. ანგარიშში საუბარია ლობისტური ჯგუფის კავშირებზე ჟურნალისტ ალექს რაუფ-ოღლუსთან, რომელიც სახელმწიფო დეპარტამენტის ბრიფინგებისას საქართველოს შესახებ კრიტიკული განცხადებებით გამოირჩევა.
ასევე, იკვეთება ლობისტური კომპანიის კავშირები შეერთებული შტატების მთავრობისა და კონგრესის წარმომადგენლებთან, როგორიცაა, კონგრესის ჰელსინკის კომისიის თანამშრომელი მაიკ ჩეჩირე.
საქართველოს პარლამენტის თავმჯდომარის მოადგილის არჩილ თალაკვაძის განცხადებით,
“ტვ ფორმულა” ენმ-ს დაემსგავსა.
“სამწუხაროდ ტელეკომპანია “ფორმულა” დაემსგავსა ენმ-ს. ზუსტად იგივე საქმეში იხდის ფულს, რაშიც “ნაციონალური მოძრაობა”. იხდის ფულს არა საქართველოს ინტერესების ლობირებისთვის, არა თავისუფალი მედიის საკითხებისთვის, არამედ იმაში, რაშიც იხდის სააკაშვილის გარემოცა.
ეს არის ჟურნალისტებს ამოფარებული დანაშაულებრივი კლანის მხილება. მათ ნახევარი მილიონი დოლარი გადაიხადეს საქართველოს იმიჯის დაზიანებისთვის. ისინი წარმოაჩენენ ისე, თითქოს საქართველო აღარ არის დასავლური ოჯახის ნაწილი და ასეთ სამარცხვინო საქმეში არის ეს ფული გადახდილი,” – აცხადებს არჩილ თალაკვაძე.