იუსტიციის სამინისტროში ნიკა მელიას საქმეზე სტრასბურგის სასამართლოს გადაწყვეტილებას გამოეხმაურნენ. როგორც მინისტრის მოადგილე ბექა ძამაშვილმა აღნიშნა, სასამართლომ დაადასტურა, რომ მელიასთან მიმართებით ევროპის კონვენციის არცერთი მუხლის დარღვევას ადგილი არ ჰქონია.
„სტრასბურგის სასამართლოს დღევანდელი გადაწყვეტილებით დადასტურდა, რომ 2019-2021 წლებში ნიკანორ მელიას დაკავება და მისი პატიმრობა იყო კანონიერი და ევროპულ კონვენციასთან სრულ შესაბამისობაში. ასევე, დღევანდელი გადაწყვეტილებიდან მნიშვნელოვანია აღინიშნოს, რომ ევროპულმა სასამართლომ არ გაიზიარა მომჩივნის მტკიცება, თითქოსდა მისი დაკავება პოლიტიკური მოტივებით განხორციელდა.
საბოლოო ჯამში, შეიძლება ითქვას, რომ ევროპული სასამართლო სრულიად დაეთანხმა იუსტიციის სამინისტროს, საქართველოს მთავრობის მიერ წარდგენილ სამართლებრივ არგუმენტებს, მტკიცებულებებთან ერთად და დაადგინა, რომ ნიკანორ მელიასთან მიმართებით ევროპული კონვენციის არცერთი მუხლის დარღვევას ადგილი არ ჰქონია“, – განაცხადა ძამაშვილმა.
სტრასბურგის ადამიანის უფლებათა სასამართლოში განხილვა საქმეზე „ნიკა მელია საქართველოს წინააღმდეგ“ საქართველოს გამარჯვებით დასრულდა. სასამართლომ საქმეზე არცერთი მუხლის დარღვევა არ დაადგინა.