რუსეთის შეჭრამ უკრაინაში, აგრესიამ და ომმა, რომელიც მიმდინარეობს და არ ჩერდება, შეცვალა მთელი მსოფლიოს დღის წესრიგი. არ მოვერიდები იმის თქმას, რომ ჩვენ სპეციფიკურ მდგომარეობაში ვიმყოფებით, რადგან ჩვენი ქვეყნის 20 პროცენტი დღესაც ოკუპირებულია, – ამის შესახებ პრემიერ-მინისტრმა, ირაკლი ღარიბაშვილმა ევროკავშირის უმაღლეს წარმომადგენელთან, ჟოზეფ ბორელთან ერთობლივ პრესკონფერენციაზე განაცხადა.
„ჩვენ კარგად გვესმის ის რთული გეოპოლიტიკური ვითარება, რომელშიც დღეს ვიმყოფებით. ალბათ, ასეთი გამოწვევის წინაშე არა მხოლოდ ჩვენი რეგიონი და ქვეყანა, არამედ მთლიანად ევროპის კონტინენტი არ ყოფილა მეორე მსოფლიო ომის შემდეგ. რუსეთის შეჭრამ უკრაინაში, აგრესიამ და ომმა, რომელიც მიმდინარეობს და არ ჩერდება, შეცვალა მთელი მსოფლიოს დღის წესრიგი. იცვლება საერთაშორისო წესრიგი, წესებზე დაფუძნებული წესრიგი, რაც რა თქმა უნდა, არის დიდი გამოწვევა ჩვენი ქვეყნისთვისაც. მითუმეტეს, ჩვენი ქვეყანა, მე მჯერა, რომ თქვენ კარგად გესმით და ჩვენს მეგობრებს, რომ საქართველო განსაკუთრებულ მდგომარეობაშია. მე არ მოვერიდები იმის თქმას, რომ ჩვენ სპეციფიკურ მდგომარეობაში ვიმყოფებით, რადგან ჩვენი ქვეყნის 20 პროცენტი დღესაც ოკუპირებულია. ჩვენს ტერიტორიაზე რუსული საოკუპაციო ჯარები დგას. პირველი ომი ჩვენ გადავიტანეთ 2008 წელს. ეს იყო დამანგრეველი ომი, რამაც ასობით ჩვენი თანამოქალაქის სიცოცხლე შეიწირა. ჯარისკაცები, პოლიციელები, სამოქალაქო პირები. ჩვენ ეს მძიმე ფასი გადახდილი გვაქვს“,- აღნიშნა ღარიბაშვილმა.