არქივის ტერიტორიაზე გაჩენილი ხანძრის გამომწვევ მიზეზს გამოძიება დაადგენს, – ამის შესახებ ჟურნალისტებს იუსტიციის მინისტრის მოადგილემ, ბუბა ლომუაშვილმა განუცხადა.
მისი თქმით, ნიტროფუძიანი კინოფირები ყველა გაციფრულებულია და მათი ასლები კინოარქივში ინახება. ცეცხლი ეროვნული არქივის სხვა შენობებზე არ გავრცელებულა. ხანძრის შედეგად არავინ დაშავებულა.
„ჩვენ გვქონდა ყველასთვის დაცვითი სისტემები, თუმცა, მოგეხსენებათ, ეს არის აალებადი კინოფირები. თუ როგორ მოხდა, ამას გამოძიება დაადგენს“, – განაცხადა ბუბა ლომუაშვილმა.
მისი თქმით, ხანძრის ადგილზე გამოძიება მიმდინარეობს და მათ იქ შესვლის უფლება არ აქვთ. მან მადლობა გადაუხადა, საგანგებო სიტუაციების მართვის სამსახურს მაღალპროფესიონალურად ჩატარებული სამუშაოსთვის.
საქართველოს ეროვნული არქივის ტერიტორიაზე არსებულ ცალკე მდგომ შენობაში ხანძარი გუშინ გაჩნდა. არსებული ინფორმაციით, შენობაში ნიტროფუძიანი კინოფირები ინახებოდა.