4 თებერვალს სიმსივნური დაავადებების წინააღმდეგ ბრძოლის საერთაშორისო დღე აღინიშნება. კიბოს, სიკვდილის მიზეზების მიხედვით, მსოფლიოში წამყვანი ადგილი უკავია. სიმსივნური დაავადებების, როგორც კაცობრიობის უდიდესი გამოწვევის მიმართ მეტი ყურადღების მისაპყრობად, ეს დღე კიბოს წინააღმდეგ ბრძოლის საერთაშორისო კავშირმა დააწესა.
2016–18 წლებში კიბოსთან ბრძოლის მსოფლიო დღის სლოგანი იქნება – „ჩვენ შეგვიძლია. მე შემიძლია“.
კიბოსთან ბრძოლის საერთაშორისო დღე კიბოს საწინააღმდეგო საერთაშორისო კავშირმა 2005 წელს დააფუძნა და ამ დღესთან დაკავშირებით, ყოველ წელს რიგი ღონისძიებები იმართება.
შეგახსენებთ, ადამიანის კიბოთი დაავადებას იწვევს ორგანიზმში უჯრედების არაკონტროლირებადი და უწესრიგო გაყოფა, რაც დღემდე ამოუხსნელი ფენომენია. სხეული უამრავი სახეობის უჯრედისგან შედგება, რომლებიც ჩვეულებრივ, იზრდება, იყოფა და ახალ უჯრედებს წარმოშობს, როდესაც ეს ორგანიზმს ესაჭიროება. კიბოს წარმოშობას ადგილი აქვს, თუკი უჯრედებში გრძელდება გაყოფის პროცესი მაშინ, როცა სხეულს ეს დამატებითი უჯრედები არ სჭირდება. ზედმეტმა უჯრედებმა შესაძლოა, წარმოქმნას სიმსივნე, რომელიც შემდეგი სახით ვლინდება:
კეთილთვისებიანი სიმსივნე – ასეთი სიმსივნე იშვიათად თუ წარმოადგენს სიცოცხლისათვის საშიშ დაავადებას და იგი არ ვრცელდება სხეულის დანარჩენ ნაწილებზე. კეთილთვისებიანი სიმსივნის ქირურგიული მოცილება შესაძლებელია და ჩვეულებრივ, მისი ხელახლა წარმოშობის რისკი დაბალია.
ავთვისებიანი სიმსივნე (კიბო) – ამ სახის სიმსივნეს შეუძლია, შეიჭრას, დააზიანოს და დაარღვიოს ახლომდებარე ქსოვილები და გავრცელდეს სხეულის სხვა ორგანოებზე.
კიბოს თავიდან აცილების მარტივი მეთოდებია:
• თამბაქოს მოხმარებაზე უარის თქმა;
• ჯანსაღი კვება და რეგულარული ვარჯიში;
• ალკოჰოლის ზომიერი მოხმარება;
• კიბოს გამომწვევი ინფექციებისგან თავის დაცვა;
რაც უფრო ადრეულ სტადიაზე იქნება გამოვლენილი კიბო და სათანადო მკურნალობა ჩაუტარდება პაციენტს, მით მეტია სრული გამოჯანსაღების შანსი.