ნიკა გვარამია ფარულ ჩანაწერზე – ეს არის “უმოწყალო მონტაჟი”

ტელეკომპანია “რუსთავი 2”-ის გენერალური დირექტორი ნიკა გვარამია, დღეს გავრცელებულ აუდიოჩანაწერს, რომელშიც ის და ყოფილი გენერალური პროკურორი ზურაბ ადეიშვილი ფიგურირებენ, მონტაჟს უწოდებს და აცხადებს, რომ ადეიშვილსა და მას შორის მსგავსი შინაარსის სატელეფონო საუბარი არ შემდგარა.
„ეს არის უმოწყალო მონტაჟი, აღებულია ჩემი ხმა ძალიან ბევრი სხვადასხვა საუბრიდან. ბატონ ადეიშვილს მე ტელეფონით ძალიან დიდი ხნის წინ ვესაუბრე. მინიმუმ ორი წელია ჩვენ ტელეფონით არ გვისაუბრია, ჩვენი საუბრები, რა თქმა უნდა, შემდგარა მაგრამ პირადად, კიევში მე არაერთხელ ვყოფილვარ. იქ რაღაც პერიოდის განმავლობაში ცხოვრობდა ბატონი ადეიშვილიც. რამდენიც არ უნდა ეცადოთ მეგობრებო -ჩემი კორუფციაში გასვრა არ გამოვა“, – აღნიშნა გვარამიამ.
უკრაინული გამოცემა “უკრაინული რევოლუცია” საქართველოს ყოფილი გენერალური პროკურორის, ზურაბ ადეიშვილისა და “რუსთავი 2”-ის გენერალური დირექტორის, ნიკა გვარამიას სატელეფონო ჩანაწერს აქვეყნებს. ჩანაწერში მოსამართლეებზე ზეწოლასა და ქრთამის სახით 3 მილიონი დოლარის მიცემაზეა საუბარი.
საუბარში ნახსენებია საქალაქო სასამართლოს ყოფილი თავმჯდომარე მამუკა ახვლედიანი.