მთავრობის ადმინისტრაციის უფროსის მოადგილე საჯარო სამსახურს ტოვებს და ბიზნესში მიდის

მთავრობის ადმინისტრაციის უფროსის მოადგილე ნინო კობახიძე საჯარო სამსახურს ტოვებს და ბიზნესში მიდის. ამის შესახებ მან Forbes Georgia-სთან ინტერვიუში განაცხადა.
ნინო კობახიძე რამდენიმეწლიანი პაუზის შემდეგ კვლავ სადაზღვევო სფეროს უბრუნდება და კერძო სექტორში საქმიანობას კომპანია Global Benefits Georgia-ში გააგრძელებს. ბაზარზე ახალი მოთამაშის დედა კომპანია ამერიკული Global Benefits Group-ია, რომელიც დამოუკიდებელი საერთაშორისო სადაზღვევო კომპანიაა, 36-წლიანი გამოცდილებით. ახალი კომპანიის პარტნიორი “საქართველოს ინდუსტრიული ჯგუფი” იქნება.
„ნინო კობახიძის კომპანია თავის ადგილობრივ და საერთაშორისო პარტნიორებთან ერთად აპირებს საქართველოს სადაზღვევო ბაზარზე ახალი ხელწერის შემოტანას – ეს იქნება ინოვაციური პროდუქტები და მოქნილი, ინდივიდუალური მიდგომა პარტნიორებთან“,– წერს ქართული „ფორბსი“.