ქალის გენიტალიების დასახიჩრების მიმართ ნულოვანი ტოლერანტობის საერთაშორისო დღესთან დაკავშირებით, გაეროს მოსახლეობის ფონდის (UNFPA) საქართველოს ოფისი UNFPA-ს აღმასრულებელი დირექტორის ბაბატუნდე ოსოტიმეჰინისა და გაეროს ბავშვთა ფონდის (UNICEF) აღმასრულებელი დირექტორის, ანტონი ლეიკის განცხადებას ავრცელებს. აღნიშნულ განცხადებას უცვლელად გთავაზობთ:
”მსოფლიომ უფრო სწრაფად უნდა გადადგას პროგრესული ნაბიჯები, რათა 2030 წლისთვის ქალის გენიტალიების დასახიჩრების საზიანო პრაქტიკა აღმოიფხვრას.
ეს გამოუსწორებელ ზიანს და მტანჯველ ტკივილს აყენებს გოგონების სხეულს.
ეს იწვევს უკიდურეს ემოციურ ტრავმას, რომელიც შეიძლება სიცოცხლის ბოლომდე გაგრძელდეს.
ეს ზრდის სასიკვდილო გართულებების რისკს ორსულობის, მშობიარობის და ბავშვის დაბადების დროს, რაც საფრთხეს უქმნის როგორც დედას, ასევე შვილს.
ეს ართმევს გოგონებს დამოუკიდებლობას და არღვევს ადამიანის უფლებებს.
ეს ხაზს უსვამს გოგონებისა და ქალების დაბალ სოციალურ სტატუსს და აძლიერებს გენდერულ უთანასწორობას, რაც, თავის მხრივ, სათავეს უდებს დისკრიმინაციისა და ზიანის უწყვეტი ციკლის არსებობას თაობებში.
ეს ქალის გენიტალიების დასახიჩრებაა და მიუხედავად იმ პროგრესისა, რასაც ჩვენ ამ საზიანო პრაქტიკის წინააღმდეგ ბრძოლაში მივაღწიეთ – წელს მილიონობით გოგონა, რომელთა უმრავლესობასაც ჯერ 15 წლის ასაკისთვის არ მიუღწევია, იძულებით გახდება მისი მსხვერპლი. სამწუხაროდ, ისინი შეუერთდებიან მსოფლიოს გარშემო მცხოვრები იმ 200 მილიონი გოგონასა და ქალის რიცხვს, რომელმაც უკვე ზიდა ქალის გენიტალიების დასახიჩრებთ გამოწვეული ზიანის ტვირთი და რომლის თემიც უკვე განიცდის ამ საზიანო პრაქტიკის შედეგს.
2015 წელს, მდგრადი განვითარების მიზნების აღიარებით, მსოფლიომ სცნო მჭიდრო კავშირი ქალის გენიტალიების დასახიჩრებას, გენდერულ უთანასწორობასა და მდგრად განვითარებას შორის, რის შედეგადაც გაძლიერდა გლობალური სამოქმედო გეგმა ქალის გენიტალიების დასახიჩრების პრაქტიკის 2030 წლამდე აღმოსაფხვრელად.
2016 წელს ქვეყნებში, სადაც UNFPA და UNCEF ამ კუთხით აქტიურად მუშაობენ, 2900-ზე მეტმა თემმა, რაც 8.4 მილიონ ადამიანს მოიცავს, უგულვებელყო ქალის გენიტალიების დასახიჩრების საზიანო პრაქტიკა.
2017 წელს ჩვენ უნდა მოვითხოვოთ სწრაფი რეაგირება ამ პროგრესის ხელშესაწყობად; რაც გულისხმობს, რომ მოვუწოდოთ მთავრობებს, მიიღონ და აღასრულონ კანონი და გაატარონ პოლიტიკა გოგონებისა და ქალების უფლებების დასაცავად და მათთვის ქალის გენიტალიების დასახიჩრების საზიანო პრაქტიკის ასარიდებლად.
ეს გულისხმობს ქალის გენიტალიების დასახიჩრების რისკის ქვეშ მყოფი გოგონებისა და ქალებისათვის და ამ საზიანო პრაქტიკას გადარჩენილთათვის მხარდამჭერ მომსახურებებზე ხელმისაწვდომობის გაძლიერებას. ეს ასევე გულისხმობს მოთხოვნის გაზრდას სერვისებზე, რომლის მეშვეობითაც ოჯახები და თემები იღებენ ინფორმაციას იმ ზიანის შესახებ, რასაც ქალის გენიტალიების დასახიჩრება იწვევს და იმ უპირატესობის შესახებ, რაც ამ პრაქტიკაზე უარის თქმას მოაქვს.
ეს ნიშნავს, რომ შედეგად, ოჯახები და თემები თავად გადადგამენ ნაბიჯებს და არ დაუშვებენ, რომ მათი გოგონები ამ საზიანო პრაქტიკის მსხვერპლნი გახდნენ.
დაე, ჩვენ ვიყოთ თაობა, რომელიც ერთხელ და სამუდამოდ აღმოფხვრის ქალის გენიტალიების დასახიჩრების საზიანო პრაქტიკას და ამით ხელს შეუწყობს ჯანსაღი და უკეთესი მსოფლიოს შექმნას ყველასთვის”, – ნათქვამია განცხადებაში.