„ჰამასი“ არ არის ტერორისტული ორგანიზაცია. ეს არის მოჯაჰედების ჯგუფი, რომელიც საკუთარ მიწას იცავს, – ამის შესახებ თურქეთის პრეზიდენტმა, რეჯეფ თაიფ ერდოღანმა თურქეთის პარლამენტში საკუთარი პარტიის წევრების წინაშე გამოსვლისას განაცხადა.
„ჰამასი“ არ არის ტერორისტული ორგანიზაცია. ეს არის მოჯაჰედების ჯგუფი, რომელიც საკუთარ მიწასა და მოსახლეობას იცავს“, – განაცხადა ერდოღანმა.
მან ასევე აღნიშნა, რომ „ისრაელის არაადამიანური ომის“ გამო ისრაელში ვიზიტს აუქმებს.
„ვგეგმავდით ისრაელში წასვლას, მაგრამ გადავიფიქრეთ და აღარ წავალთ“, – განაცხადა თურქეთის პრეზიდენტმა.
მან ასევე მოუწოდა ომში ჩართულ მხარეებს, დაუყოვნებლივ შეწყვიტონ ცეცხლი და გამოაცხადონ ზავი.
„მოვუწოდებ ყველა ქვეყანას, გააძლიერონ ზეწოლა ნეთანიაჰუს მთავრობაზე, რათა გონს მოიყვანონ ისრაელი. ველოდებით აქტიურობას „ისლამური თანამშრომლობის ორგანიზაციისგან“, რომელიც პალესტინური საკითხის დასაცავად დაფუძნდა. გამოვდივართ ინიციატივით, ჩატარდეს „საერთაშორისო პალესტინა-ისრაელის სამშვიდობო კონფერენცია“, რომელშიც მონაწილეობას მიიღებს რეგიონის ყველა გავლენიანი ქვეყანა“, – აღნიშნა ერდოღანმა.