თუ შედეგი ევროპელების მოწონებული იქნება, მე პრეტენზია ევროპელებთან მექნება, – ამის შესახებ „გირჩის“ წევრმა ალექსანდრე რაქვიაშვილმა ევროკავშირის ელჩ პაველ ჰერჩინსკის მიერ „მაუწყებლობის შესახებ კანონზე“ გაკეთებულ განცხადებასთან დაკავშირებით განაცხადა.
„[ჰერჩინსკის] განცხადება ამ ნაწილში [„მაუწყებლობის შესახებ კანონთან“ დაკავშირებით] საერთოდ არ მომეწონა. სულ არ ვაპირებ ამის გამო ჩემი პოზიციის შეცვლას, რომ სიტყვის თავისუფლება კარგი, ცოტა შევზღუდოთ, რადგან ვიღაც დიპლომატმა ასე თქვა. ეს განცხადება არ იყო მკაფიო. ერთია, რაღაც პროცესით იყო კმაყოფილი და მეორე – შედეგი. თუ შედეგი ევროპელების მოწონებული იქნება, მე პრეტენზია ევროპელებთან მექნება“, – აღნიშნა რაქვიაშვილმა.
„გასული კვირების განმავლობაში, განსაკუთრებით საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, ჯოზეფ ბორელის ვიზიტის შემდეგ, ცხადად არის აჩქარება და ბევრი დადებითი მოვლენა, მათ შორის არის „მაუწყებლობის კანონზე“ მუშაობა, ზოგიერთ სამოქალაქო ორგანიზაციას შორის გაფორმებული ურთიერთგაგების მემორანდუმი“, – ამის შესახებ საქართველოში ევროკავშირის ელჩმა, პაველ ჰერჩინსკიმ განაცხადა.