„ქრონიკა“ ისრაელში მუშაობას განაგრძობს. როგორც ილანა ჯანაშვილი ისრაელიდან იტყობინება, ქალაქ რიშონ ლეციონში რამდენიმე ქართველი ქალი შეიკრიბა და მოხალისეობრივად ისრაელელი ჯარისკაცებისთვის ქართულ კერძებს ამზადებს.
„ახლა ჩვენ ვიმყოფებით ქალაქ რიშონ ლეციონში ერთ-ერთ ბინაში, რომელიც ეკუთვნის ქართველებს და მათ კარი გაუღეს 4 ფანტასტიკურ ქართველ ქალბატონს, რომლებმაც გადაწყვიტეს 200 ჯარისკაცისთვის დღეს მოემზადებინათ ყველასთვის საყვარელი ქართული კერძები, ხაჭაპური, ლობიანი და ტკბილი ფლავი. ომის დაწყებიდან დღემდე შეიძლება ითქვას, რომ ისრაელის მთელი მოსახლეობა არის გაერთიანებული და ისინი ჰუმანიტარულ, ფსიქოლოგიურ თუ ფინანსურ დახმარებას უწევენ არა მხოლოდ ჯარისკაცებს, არამედ დევნილებსაც. ქალბატონებიც, რომელთაც დღეს ვესაუბრეთ, ომის დაწყების დღიდან ეხმარებოდნენ ჯარისკაცებს და დღეს გადაწყვიტეს მათთვის საყვარელი კერძები მოემზადებინათ. შეაგროვეს ფული ქართველებისგან და დღეს, შაბათს, ერთადერთ დასვენების დღეს ჯარისკაცებისთვის საჭმელს ამზადებენ“, – თქვა ილანა ჯანაშვილმა.