მელია ცდილობს, რომ „ნაციონალური მოძრაობიდან“ რაც შეიძლება მეტი გადაქაჩოს საკუთარ მხარეს, – ამის შესახებ ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ მიხეილ სარჯველაძემ განაცხადა.
„გასაგებია, რომელი აპირებს ცალკე თამაშის წამოწყებას და ცდილობს ახლა, რომ „ნაციონალური მოძრაობიდან“ რაც შეიძლება მეტი გადაქაჩოს საკუთარ მხარეს. თვლიან, რომ პარლამენტში შესვლა არ შეიძლება, ქუჩაში რევოლუციური პროცესების განვითარება არის ერთადერთი სწორი გზა. ამ ტიპის ელექტორატზე ცდილობს, რომ ქულები დაიწეროს ბატონმა მელიამ და გაქაჩოს და შესაბამისად, ეს ნანგრევი წაიღოს მის მხარეს, მის სასარგებლოდ“, -აღნიშნა სარჯველაძემ.
ნიკა მელია პარლამენტში მყოფ „ნაციონალური მოძრაობის“ წევრებს საქმიანობას უწუნებს. ყოფილი თავმჯდომარე კოლეგებს 12 რეკომენდაციის, მიხეილ სააკაშვილისა და ასევე იმ უფლებების გამო აკრიტიკებს, რომლის მიხედვითაც შესაძლებელი იყო საპარლამენტო კომისიის შექმნა.
„ანუ გამოდის პარლამენტში გიწევთ ერთადერთ ფუნქციის შესრულება – პარლამენტის შელამაზება ქართულ ოცნებისთვის. მესმის ხელფასი, მანქანა, ბენზინი და სხვა პრივილეგიები, მაგრამ არ ღირს ეს ყველაფერი ოცნების პარლამენტის გაკეთილშობილების მცდელობად“, – წერს ნიკა მელია სოციალურ ქსელში.