გერმანია დღეიდან ქვეყანაში „ჰამასისა“ და „პალესტინელი პატიმრების სოლიდარობის ქსელის“ საქმიანობას აკრძალავს. ამის შესახებ გერმანიის შინაგან საქმეთა მინისტრმა, ნენსი ფეზერმა განაცხადა.
აკრძალვა გულისხმობს, რომ ვინც აგრძელებს რაიმე ფორმით საქმიანობას რომელიმე ორგანიზაციისთვის, სჩადის სისხლის სამართლის დანაშაულს.
„როგორც გერმანიის შინაგან საქმეთა მინისტრი, მე დღეს ვკრძალავ „ჰამასისა“ და პალესტინელი პატიმრების სოლიდარობის ქსელის“ საქმიანობას გერმანიაში. ტერორისტული ორგანიზაცია „ჰამასი“ მიზნად ისახავს ისრაელის სახელმწიფოს განადგურებას. ჩვენ ვხედავთ მათ პროპაგანდას გერმანიაში, განსაკუთრებით აგრესიულ დემონსტრაციებში, ასევე ებრაულ ინსტიტუციებსა და ებრაელთა სახლებზე თავდასხმებში. ებრაელი ხალხი უსაფრთხოდ უნდა იყოს გერმანიაში“, – აღნიშნა ნენსი ფეზერმა.
შეგახსენებთ, გერმანიამ „ჰამასი“ ტერორისტულ ორგანიზაციად გამოაცხადა.