“ნაციონალურ მოძრაობაში” შიდა დაპირისპირება გრძელდება. ბრალდებებს ერთმანეთს პარტიის ყოფილი და მოქმედი თავმჯდომარეების მხარდამჭერები უყენებენ. მიზეზი პარლამენტში “ნაციონალური მოძრაობის” ყოფნაა. თემა მორიგ ეტაპზე აქტუალური ნიკა მელიას პოსტმა გახადა.
მელია მიიჩნევს, რომ პრივილეგიებით სარგებლობისა და მმართველი პარტიის ინტერესების გატარების გარდა, ენმ საკანონმდებლო ორგანოში არაფერს აკეთებს. ბრალდებები მიუღებელია ხაბეიშვილის გუნდისთვის. პროცესებს აფასებენ მმართველ გუნდშიც.
“თუ პარლამენტში ხარ, როგორც მინიმუმ პოლიტიკურ აქტივობაში უნდა იყო ჩაბმული თავიდან ბოლომდე და პოლიტიკურ ამინდს უნდა ქმნიდე. არ შეიძლება უმოქმედობის გამო, “ქართული ოცნების” დასაცინი იყო. ეს საერთო საქმეს აზიანებს, წარმოაჩენს ოპოზიციას ისე, თითქოს ის არ არსებობს. სამწუხაროდ, არიან ადამიანები, რომლებიც ვერ ელევიან იმ პრივილეგიებს, რომელსაც სადეპუტატო მანდატი ქმნის“, – განაცხადა ბაჩო დოლიძემ.
პარლამენტის ფრაქციის ”ერთიანი ნაციონალური მოძრაობა – ძალა ერთობაშია-ს” წევრის დავით ხაჯიშვილის თქმით, მას არ აინტერესებს ნიკა მელია რას ამბობს, რადგან მელიას პოზიცია მისთვის მიუღებელია.
“ფრაქცია “ნაციონალური მოძრაობა” ყოველთვის არის იქ, სადაც არის ქვეყნისთვის მნიშვნელოვანი გადაწყვეტილებების მიღება ხდება. ახსნა-განმარტებები არ უნდა დამჭირდეს ვინმესთან, არც ნიკა მელიასთან თუ რას აკეთებს “ნაციონალური მოძრაობა” პარლამენტში. ამიტომ, პირდაპირ ვამბობ – არ ვეთანხმები და შესაბამისად, არ მაინტერესებს რას ამბობს ნიკა მელია”, – განაცხადა დავით ხაჯიშვილმა.