ვინმეს თუ ჰგონია, რომ მერაბიშვილ-კეზერაშვილის კრიტიკა არის პარტიის ლანძღვა, მე ასე არ მივიჩნევ, მე და ჩემს მეგობრებს პარტია არ გაგვილანძღავს, – ამის შესახებ „ნაციონალური მოძრაობის“ წევრმა, ბაჩო დოლიძემ განაცხადა.
როგორც ბაჩო დილიძემ აღნიშნა, „არ მივიჩნევ, რომ მე და ჩემი მეგობრები ვაზიანებთ პარტიას“.
„პრობლემები, რაც პარტიაშია, არ მგონია თუნდაც ჩვენი წასვლით და დისტანცირებით მოგვარდეს, რადგან სულ სხვა რამეშია საქმე. ჩვენ არ ვართ პარტიისთვის პრობლემა, პრობლემა არის ის არსებული ვითარება და კონფიგურაცია, რომელიც დღეს არის „ნაციონალურ მოძრაობაში“. თავი არ უნდა მოვიტყუოთ. განსხვავებული აზრი ეს არის დემოკრატიის ნაწილი, თუ არ არის განსხვავებული აზრი პარტიაში, მაშინ რითი განსვსხვავდებით მმართველი ძალისგან, რომელიც დღეს არის წარმოდგენილი. საერთოდ არ მგონია, განსხვავებული და თავისუფალი აზრი ასუსტებდეს პარტიას. მარტივი პასუხია წასვლა-არწასვლაზე, მაშინ როდესაც შეხვედრებს მოვრჩებით, მივიღებთ გადაწყვეტილებას. ბევრ საკითხზე მიდის მსჯელობა, მათ შორის იმაზე, ხომ არ სჯობს ახალი პლატფორმიდან ბრძოლა, ყველანაირი ვარიანტი განიხილება, მაგრამ გადაწყვეტილება მიიღება შეხვედრების შემდეგ.
ჩვენ და ხაბეიშვილი განსხვავებულ ენაზე ვსაუბრობთ მგონი, მაგიტომაც არის რომ ხშირად ერთმანეთს ვერ ვუგებთ. საკითხი გაცილებით ტრაგიკულად გვაქვს. არიან ადამიანები, რომლებსაც ჰგონიათ, რომ ძველი წარსულით არის შესაძლებელი შედეგის დადება, მაგრამ გვავიწყდება ერთი რამ, რომ ჩვენ ამომრჩეველს ალტერნატივა თუ არ შევთავაზეთ, „ქართული ოცნება“ 2024 წლის შემდეგაც იქნება ხელისუფლებაში. ჩვენ გვინდა წაუგებელი თამაში, რისი არავითარი საშუალებაც არ არსებობს პარტიაში“, – განაცხადა ბაჩო დოლიძემ.