აშშ-მა პასუხი უნდა აგოს იმ დანაშაულებზე, რომელიც ისრაელმა ღაზის სექტორში ჩაიდინა, ამიტომ წინააღმდეგობის ძალები თავს ესხმოდნენ და გააგრძელებენ თავდასხმებს ამერიკულ ჯარებზე ერაყსა და სირიაში, – ამის შესახებ რადიკალური შიიტური დაჯგუფება „ჰეზბოლას“ ლიდერმა, ჰასან ნასრალამ განაცხადა.
„ისრაელმა აჩვენა, რომ სუსტი ქვეყანაა, მყიფე, როგორც აბლაბუდა, ის ამერიკისა და დასავლეთის მხარდაჭერას საჭიროებს. ღაზის სექტორში გამარჯვება იქნება არა ირანის ან „ძმები მუსლიმების“ გამარჯვება. ეს იქნება პირველ რიგში პალესტინელების გამარჯვება, მაგრამ ასევე ეგვიპტის, იორდანიის, სირიისა და ლიბანის გამარჯვება. ამიტომ ჩვენი ვალდებულებაა, ღაზაში „ჰამასს“ დავუჭიროთ მხარი“, – განაცხადა ნასრალამ.
მან ასევე აღნიშნა, რომ „ჰეზბოლა“ ბრძოლაში 8 ოქტომბერს ჩაერთო. მისივე თქმით, ლიბანის საზღვარზე ყოველდღიური ორმხრივი სროლა შესაძლოა ვინმეს მოკრძალებულად მოეჩვენოს, მაგრამ ასეთი რამ 1948 წლის შემდეგ არ მომხდარა. ნასრალას თქმით, ამით „ჰეზბოლა“ აიძულებს ისრაელს, თავისი ჯარები ჩრდილოეთ საზღვართან ამყოფოს, და არ გაგზავნოს ისინი ღაზაში ან იორდანეს დასავლეთ ნაპირზე.