ისრაელის პრემიერ-მინისტრის, ბენიამინ ნეთანიაჰუს განცხადებით, მძევლების გათავისუფლების გარეშე დროებითი ზავი არ იქნება. ისრაელური მედიის ცნობით, ამის შესახებ ნეთანიაჰუმ აშშ-ის სახელმწიფო მდივანს, ენტონი ბლინკენს განუცხადა.
მისივე თქმით, ისრაელი ღაზის სექტორში საწვავის შეტანას არ დაუშვებს და ასევე ეწინააღმდეგება ღაზაში ფულის გაგზავნას.
„ისრაელის მტრებს ჩვენი ქვეყნის განადგურება სურთ, თუმცა ისინი მიზანს ვერ მიაღწევენ. ჩვენ არ გავჩერდებით იქამდე, ვიდრე გამარჯვებას არ მივაღწევთ. გამარჯვება ნიშნავს „ჰამასის“ განადგურებას, მძევლების გათავისუფლებას და ჩვენი მოსახლეობის უსაფრთხოების აღდგენას“, – აღნიშნა ნეთანიაჰუმ.
ის ასევე გამოეხმაურა „ჰეზბოლას“ ლიდერის, ჰასან ნასრალას მიმართვას და გააფრთხილა „ისრაელის ჩრდილოელი მტრები, არ დაუშვან საბედისწერო შეცდომა და არ მოახდინონ ომის ესკალაცია“.