ისრაელის მთავრობის პრესსპიკერი, ეილონ ლევი რადიკალური შიიტური დაჯგუფება „ჰეზბოლას“ ლიდერის, ჰასან ნასრალას დღევანდელ გამოსვლას გამოეხმაურა.
„ჩვენ მოვისმინეთ ჰასან ნასრალას გრძელი და ამაზრზენი გამოსვლა. ვაღიარებ, რომ ეს იმდენად მოსაწყენი იყო, რომ არ ვიცი, ნეტავ მისი სპიჩრაიტერი „ჰეზბოლაზე“ ჩვენი იერიშების დროს მოკლეს.
მიუხედავად ხალხის სიმრავლის, თავად ჰასან ნასრალა სცენაზე არ გამოჩენილა. ის ლაჩარივით იმალება ბუნკერში. მეც რომ გამოვდიოდე ერთსაათიანი სიტყვით და ვიცავდე „ჰამასის“ პედოფილ მოძალადეებს, მეც შემეშინდებოდა საკუთარი სახის გამოჩენის“, – აღნიშნა ისრაელის მთავრობის პრესსპიკერმა.
ცნობისთვის, „ჰეზბოლას“ ლიდერმა, ჰასან ნასრალამ ისრაელ-„ჰამასის“ ომის დაწყების შემდეგ პირველი ვიდეომიმართვა გაავრცელა, სადაც განაცხადა, რომ 7 ოქტომბრის ოპერაცია 100%-ით პალესტინელების მიერ იყო დაგეგმილი და განხორციელებული, „ჰეზბოლა“ კი ამის შესახებ ინფორმირებული არ ყოფილა.