ჰამბურგის აეროპორტში შეიარაღებულმა მამაკაცმა ავტომობილით ჯებირი გაარღვია, ასაფრენ ბილიკზე შეიჭრა და ჰაერში რამდენჯერმე იარაღი გაისროლა. მომხდარის გამო, აეროპორტი ამჟამად დაკეტილია. ინფორმაციას „დოიჩე ველე” ავრცელებს.
შემთხვევა ადგილობრივი დროით დაახლოებით 20:00-ზე მოხდა.
ჰამბურგის პოლიციამ დაადასტურა, რომ მანქანაში, რომლითაც შეიარაღებული მამაკაცი გადაადგილდება, ერთი ბავშვი იმყოფება. ამასთან, თავდაპირველად გავრცელდა ინფორმაცია, რომ შეიარაღებულმა მამაკაცთან ერთად ორი ბავშვი იმყოფებოდა, რომელიც დადასტურებული არ არის.
სამართალდამცველებმა ასევე განაცხადეს, რომ შეიარაღებული მამაკაცის მეუღლე მათ ადრე დაუკავშირდა ბავშვის შესაძლო გატაცების შესახებ.
ადგილზე მობილიზებული არიან სახელმწიფო და ფედერალური პოლიციის ძალები.
მომხდარის გამო, ჰამბურგის აეროპორტში დღეს დაგეგმილი რეისები აღარ შესრულდება.
„ჰამბურგის აეროპორტის ასაფრენ ბილიკზე არსებული სიტუაციის გამო, დღეს ფრენები აღარ იქნება. ყველა დაზარალებული მგზავრი პირდაპირ უნდა დაუკავშირდეს ავიაკომპანიას”, – ნათქვამია ჰამბურგის აეროპორტის განცხადებაში.