უკრაინის პრეზიდენტის ოფისმა, შეიარაღებული ძალების მთავარსარდალი ვალერი ზალუჟნი, სასტიკად გაკიცხვა იმის გამო, რომ გენერალმა ზალუჟნიმ ბრიტანულ ჟურნალ The Economist-ში გამოქვეყნებულ სტატიაში აღიარა, რომ რუსეთ-უკრაინის ომი სტატიკური, პოზიციური ბრძოლების ეტაპზე გადავიდა, რაც უფრო რუსეთისთვის არის ხელსაყრელი, ვინაიდან ის საკუთარი სამხედრო შესაძლებლობების აღდგენას შეძლებს. ამის შესახებ The New York Times-ი წერს.
გამოცემის ცნობით, ეს საჯარო კრიტიკა უკრაინის სამოქალაქო და სამხედრო ხელმძღვანელობას შორის არსებულ მზარდ განხეთქილებაზე მიანიშნებს.
უკრაინის პრეზიდენტის ოფისის ხელმძღვანელის მოადგილის, იგორ ჟოვკვას განცხადებით, გენერალ ზალუჟნის სიტყვებმა „აგრესორს საქმე გაუადვილა“ და „გამოიწვია პანიკა“ უკრაინის დასავლელ მოკავშირეებს შორის.
ზალუჟნის განცხადებებს თავად ზელენსკიც გამოეხმაურა – „გადის დრო, ადამიანები იღლებიან, განურჩევლად მათი სტატუსისა, და ეს გასაგებიცაა. თუმცა ეს არ არის ჩიხი, ამას კიდევ ერთხელ ვუსვამ ხაზს“ – აღნიშნა უკრაინის პრეზიდენტმა.
აღსანიშნავია, რომ რამდენიმე დღის წინ ზელენსკის ოფისმა ზალუჟნის ერთ-ერთი მოადგილე, სპეციალური ოპერაციების ძალების ხელმძღვანელი გადააყენა. ჯერჯერობით უცნობია, იცოდა თუ არა მთავარსარდალმა ზალუჟნიმ წინასწარ, ამ საკადრო გადაწყვეტილების შესახებ.