ისრაელის პრემიერ-მინისტრის, ბენიამინ ნეთანიაჰუს მრჩეველი მარკ რეგევი აცხადებს, რომ ისრაელი არ გეგმავს ღაზის ოკუპაციას.
ნეთანიაჰუს მრჩეველმა, მარკ რეგევმა კომენტარი გააკეთა ნეთანიაჰუს განცხადებაზე, რომლის მიხედვითაც, ომის დასრულების შემდეგ ისრაელს განუსაზღვრელი ვადით დაეკისრება პასუხისმგებლობა ღაზაში საერთო უსაფრთხოებაზე.
„ჩვენ არ ვსაუბრობთ ღაზის სექტორის რაიმე სახის მიმდინარე ოკუპაციაზე. ჩვენ უნდა განვასხვაოთ უსაფრთხოების უზრუნველყოფა და პოლიტიკური კონტროლი“, – განაცხადა რეგევმა.
რეგევის თქმით, მნიშვნელოვანია, რომ ომის დასრულების შემდეგ „ჰამასმა“ ძალების აღდგენა ვეღარ შეძლოს.
„„ჰამასს“ როცა დავამარცხებთ, მნიშვნელოვანია, რომ ტერორისტული ელემენტი ვერ აღდგეს. ისრაელის უსაფრთხოების ძალები უნდა იყოს, მაგრამ ეს არ ნიშნავს, რომ ისრაელი ხელახლა მოახდენს ღაზის სექტორის ოკუპაციას, ეს არ ნიშნავს, რომ ისრაელი იქ ღაზის სექტორის სამართავად იქნება. პირიქით, ჩვენ დაინტერესებული ვართ ახალი ჩარჩოების ჩამოყალიბებით, სადაც ღაზის მოსახლეობა შეძლებს საკუთარი თავის მართვას, სადაც იქნება საერთაშორისო მხარდაჭერა ღაზის რეკონსტრუქციისთვის“, – აღნიშნა რეგევმა.