სამხრეთ კავკასიასა და ცენტრალურ აზიაში ნატო-ს გენერალური მდივნის სპეციალური წარმომადგენელი ხავიერ კოლომინა სოციალურ ქსელში ეხმაურება ევროკომისიის გადაწყვეტილებას, რომლის მიხედვითაც, კომისია რეკომენდაციით მიმართავს ევროპულ საბჭოს, საქართველოს ევროკავშირის კანდიდატი ქვეყნის სტატუსი მიენიჭოს.
„ვულოცავ საქართველოს ხელისუფლებას და ქართველ ხალხს. ევროპული საბჭოსადმი ევროკომისიის რეკომენდაცია, რომ საქართველოს მიენიჭოს ევროკავშირის წევრობის კანდიდატის სტატუსი, არის ამ ქვეყნის მიერ შესრულებული სამუშაოს აღიარება, ისევე როგორც საქართველოს ერთგულებისა საერთო ღირებულებებისადმი“, – წერს ხავიერ კოლომინა.
ევროკავშირის გაფართოების შესახებ ევროკომისიის ყოველწლიური ანგარიში გუშინ გამოქვეყნდა. ანგარიში მოიცავს საქართველოსაც და შეფასებულია საქართველოში განხორციელებული რეფორმები, 12 რეკომენდაციის შესრულება. ევროკომისიამ რეკომენდაციით მიმართა ევროპულ საბჭოს, საქართველოს ევროკავშირის კანდიდატი ქვეყნის სტატუსი მიენიჭოს.