უკრაინის შეიარაღებული ძალების მთავარსარდლის, ვალერი ზალუჟნის თანაშემწის დაღუპვასთან დაკავშირებით ბრალი წარუდგინეს მის კოლეგას, ოლეგ ტიმჩენკოს, რომელმაც გენადი ჩასტიაკოვს ხელყუმბარა აჩუქა.
„დადგენილია, რომ ოფიცერმა შესაბამისი ნებართვის გარეშე შეიძინა რვა ცალი უნივერსალური ხელყუმბარა და მიიტანა სამუშაო კაბინეტში. შემდეგ ხელყუმბარები სასაჩუქრე ხის ყუთში ჩადო, ასევე ყუთში ჩადო ალკოჰოლური სასმელი და სამხედრო მოსამსახურე გენადი ჩასტიაკოვს დაბედების დღეს აჩუქა. ტიმჩენკო კიდევ ორ ხელყუმბარას ინახავდა სამუშაო კაბინეტის კარადაში, საიდანაც ისინი სამართალდამცავი ორგანოების თანამშრომლებმა ამოიღეს“, – ნათქვამია უკრაინის სახელმწიფო საგამოძიებო ბიუროს განცხადებაში.
უკრაინული მედიის ცნობით, შეიარაღებული ძალების მთავარსარდლის მოადგილის პირველ თანაშემწეს, ოლეგ ტიმჩენკოს ასაფეთქებელი მოწყობილობის ნებართვის გარეშე შეძენის, შენახვისა და ტარების მუხლით წარუდგინეს ბრალი. დანაშაულის დამტკიცების შემთხვევაში მას შვიდ წლამდე პატიმრობა ემუქრება.