ირაკლი ბენდელიანმა განმარტა რა ეტაპზეა უნივერსიტეტის ქუჩისა და წერეთლის გამზირის სარეაბილიტაციო სამუშაოები. ამ თემაზე თბილისის მერის მოადგილემ „ქრონიკაში“ ისაუბრა. მისი თქმით, წერეთლის გამზირის რეაბილიტაცია 24-საათიან რეჟიმში მიმდინარეობს.
„როდესაც ამ მასშტაბის პროექტზე ვსაუბრობთ, ბუნებრივია, ყოველთვის არის გაუთვალისწინებელი სამუშაოები. მოსახლეობას ახსოვს, პროექტის დასაწყისში იქ აღმოჩნდა სამარხები, გარდა ამისა არსებობს ექსპლუატაციაში არ მყოფი ძველი ქსელები – უამრავი გაუთვალისწინებელი სამუშაო არსებობს. თუმცა, როგორც პროექტის დასაწყისში აღვნიშნეთ, წერეთლის გამზირის რეაბილიტაციის დასრულების ვადად განსაზღვრული გვაქვს მომდევნო წლის იანვრის თვე და პროექტი დათქმულ ვადაში დასრულდება.
უნივერსიტეტის ქუჩაზე რეაბილიტაციის ბოლო ეტაპები მიმდინარეობს. რეაბილიტაციას დაახლოებით 2 კვირაში, ნოემბრის ბოლოს დავასრულებთ და შესაძლებელი იქნება უკვე მოძრაობის სრულად აღდგენა. მომდევნო წლის იანვრის ბოლოს დამთავრდება წერეთლის გამზირის რეაბილიტაცია“, – განაცხადა ბენდელიანმა.