საგარეო ურთიერთობათა კომიტეტის თავმჯდომარემ, ეუთო-ს საპარლამენტო ასამბლეაში საქართველოს დელეგაციის ხელმძღვანელმა ნიკოლოზ სამხარაძემ ეუთოს საპარლამენტო ასამბლეის პრეზიდენტ პია კაუმასთან შეხვედრის დეტალებზე ისაუბრა.
„ვიზიტის დროს ძირითადად, საუბარი იყო უსაფრთხოების თემებზე. ჩვენ გვქონდა ასევე საუბარი იმაზე, რომ მომავალ წელს ოქტომბერში, როდესაც საქართველოში საპარლამენტო არჩევნები გაიმართება, ეუთო-ს საპარლამენტო ასამბლეის წარმომადგენლები დააკვირდებიან ჩვენს არჩევნებს. ასევე, დაინტერესდნენ იმ რეფორმით, რომელიც საარჩევნო კანონმდებლობაში განხორციელდა. საკმაოდ ნაყოფიერი ვიზიტი გამოვიდა და ისინი ასევე თავის თვალით მოინახულებენ საოკუპაციო ხაზს“, – განაცხადა სამხარაძემ.
ეუთოს საპარლამენტო ასამბლეის პრეზიდენტი პია კაუმა დღეს საოკუპაციო ხაზს მოინახულებს და სოფელ ოძისში არსებულ ვითარებას პირადად გაეცნობა.