დიდი ბრიტანეთის საგარეო საქმეთა ახალი მინისტრი დევიდ კემერონი თანამდებობაზე დანიშვნის შემდეგ პირველი ვიზიტით უკრაინას ეწვია. ამის შესახებ X-ზე უკრაინის პრეზიდენტი ვოლოდიმირ ზელენსკი წერს.
უკრაინის პრეზიდენტის თქმით, კემერონთან შეხვედრაზე მათ განიხილეს შეიარაღების მიწოდების, საჰაერო თავდაცვის გაძლიერების საკითხები და კრიტიკული ინფრასტრუქტურისა და მშვიდობიანი მოსახლეობის დაცვის აუცილებლობა. ზელენსკიმ ასევე აღნიშნა, რომ ახლა მსოფლიო ისე აღარ არის ფოკუსირებული უკრაინაში შექმნილ ვითარებაზე, რაც „კარგი არაა“, და მადლობა გადაუხადა დიდ ბრიტანეთს უკრაინის მხარდაჭერისთვის.
„მსურდა, პირველი ვიზიტით აქ ჩამოვსულიყავი. აღფრთოვანებული ვარ უკრაინელი ხალხის ძალითა და მონდომებით. ამ ვიზიტით მინდა დაგიდასტუროთ, რომ გავაგრძელებთ უკრაინის მორალურ, დიპლომატიურ, ეკონომიკურ და სამხედრო მხარდაჭერას იმდენ ხანს, რამდენიც საჭირო გახდება“, – აღნიშნა დევიდ კემერონმა.