26 ოქროს, 8 პლატინის ჩანაწერის ავტორი საქართველოში – 70-იანი წლებიდან მსოფლიო მუსიკალური ჩატების ლიდერი, 80 წლის იტალიელი მომღერალი, 24 ნოემბერს საქართველოში პირველად იმღერებს. ალ ბანომ საკუთარი სოლო კონცერტი უკვე დააანონსა და საქართველოში ვიდეო მიმართვაც გამოაგზავნა.
“მსურს გავიცნო ერი, რომელიც დიდი ხანია მხიბლავს”-ამბობს მომღერალი და იმედს გამოთქვამს, რომ ფონდ ცხოვრება მშვენიერის მიერ ორგანიზებული კონცერტით შეძლებს აუტისტური სპექტრის მქონე ბავშვებს დაეხმაროს.
ცნობილი იტალიელი მომღერლის კარიერა და პირადი ცხოვრება, ყოველთვის მსოფლიო მედიის ყურადღების ცენტრში იყო. ის მომავალი მეუღლის ოჯახმა გარეგნობის გამო დაიწუნა, თუმცა მაინც შექმნა ოჯახი რომინასთან, რომელიც მეუღლეს სიმღერების ტექსტს უწერდა. თბილისში ალ ბანოს კონცერტზე დასასწრები თითქმის ყველა ბილეთი გაყიდულია, მსმენელი მის 2 საათიან კონცერტს და იმ ცნობილ ჰიტებს ელოდება, რომლითაც იტალიელმა მომღერალმა მსმენელს თავი ბოლო ნახევარი საუკუნის განმავლობაში შეაყვარა.