შინაგან საქმეთა სამინისტროს საგანგებო სიტუაციების მართვის სამსახურის ინსტრუქტორებისთვის, პოლონეთის სახანძრო უნივერსიტეტის მიერ ორგანიზებული სწავლების დასკვნითი ეტაპი გაიმართა, – ამის შესახებ ინფორმაციას საგანგებო სიტუაციების მართვის სამსახური ავრცელებს.
მათივე ინფორმაციით, სწავლება, რომელიც 5 დღის განმავლობაში მიმდინარეობდა, მოიცავდა როგორც თეორიულ, ასევე პრაქტიკულ სავარჯიშოებს.
სიმულაციური სცენარის მიხედვით, სახანძრო-სამაშველო დეპარტამენტის ინსტრუქტორებმა საგზაო სატრანსპორტო საშუალებების ხანძრის სალიკვიდაციო სამუშაოების და საგზაო-სატრანსპორტო შემთხვევების დროს საავარიო-სამაშველო სამუშაოების ჩატარების ტრენინგი გაიარეს. გარდა ამისა, პოლონური მხარის მიერ მომზადებულმა ქართველმა ინსტრუქტორებმა ჩაატარეს სემინარი თემაზე: „თანამედროვე ტექნოლოგიები საავტომობილო ტრანსპორტში და გამოწვევები საავარიო – სამაშველო სამუშაოების ჩატარების დროს“.
აღნიშნული სწავლების ფარგლებში, საგანგებო სიტუაციების მართვის სამსახურს პოლონეთის სახანძრო უნივერსიტეტის მხრიდან სპეციალიზებული სახანძრო-სამაშველო ფუნქციების მქონე ავტომანქანა გადმოეცა.
სწავლების დასკვნით ეტაპს, საგანგებო სიტუაციების მართვის სამსახურის სახანძრო-სამაშველო ძალების დეპარტამენტის ხელმძღვანელი პირები და საქართველოში პოლონეთის რესპუბლიკის საელჩოს წარმომადგენლები დაესწრნენ. ღონისძიების დასასრულს სტუმრებმა სწავლების მონაწილეებს სერტიფიკატები გადასცეს.
