„ნაციონალური მოძრაობის“ ყოფილი წვერი თეიმურაზ ბასილაია აცხადებს, რომ პარტიიდან წასვლის მიზეზი პარტიის ახალ მენეჯმენტთან უთანხმოება გახდა.
„გაუცხოებაა იმ ხალხისგან, რომელსაც ახალი მენეჯმენტი წარმოადგენს. ძალიან ბევრ საკვანძო საკითხში და მიმართულებაში ინტერესები გაიყო. იგნორირებული იქნა ძალიან ბევრი რამ და ბოლოს ვნახეთ, რომ ფოთში ქალბატონი დარეჯანი გარიცხეს ფრაქციის თავმჯდომარეობიდან. ადამიანი, რომელიც 24-საათი „ვივამედთან“ და ციხესთან მესამე პრეზიდენტს გულშემატკივრობდა. ამას ხედავდა ოჯახიც, ყველა და მედიასაშუალებებითაც არაერთხელ გაშუქდა. ანალოგიური რეპრესიები, მსუბუქი, თუ მძიმე – ყველგან ხდებოდა“, – აღნიშნა ბასილაიამ.
„ნაციონალურ მოძრაობას“ პარტიის წევრები ტოვებენ. ზუგდიდში პარტიიდან წასვლის შესახებ განცხადება „ნაციონალური მოძრაობის“ 17-მა წევრმა გააკეთა, მათგან 14 ზუგდიდის საკრებულოს ფრაქცია „ნაციონალური მოძრაობის“ წევრია.