ოპოზიციამ, რომელმაც მონაწილეობა არ მიიღო სამუშაო პროცესებში, შეცდომა დაუშვა. არ ვიცი ისინი იმავე შეცდომის დაშვებას აპირებენ თუ არა, მაგრამ გაორმაგებული მოტივაციით მიიღებს ჩვენი გუნდი სამუშაო ფორმატებში მონაწილეობას, – ამის შესახებ პარტია „საქართველოსთვის“ წევრმა ანა ბუჩუკურმა განაცხადა.
ამით პოლიტიკოსი ევროკომისიის მიერ განსაზღვრული ნაბიჯების შესრულების სამოქმედო გეგმას გამოეხმაურა.
„ეს [9 პრიორიტეტის შესრულების გეგმა] არის უსუსტესი გეგმა. ფაქტობრივად რეფორმების განხორციელების ნულოვანი სურვილი ჩანს ამ გეგმაში. როგორც ჩანს, ზუსტად ამიტომ მალავდა ხელისუფლება ამ ე.წ. სამოქმედო გეგმას. ეჭვი გვაქვს, რომ არავისთან ეს გეგმა, პარტნიორებს ვგულისხმობ, შეთანხმებული და გავლილი არ არის. ოპოზიციამ, რომელმაც მონაწილეობა არ მიიღო სამუშაო პროცესებში, შეცდომა დაუშვა. არ ვიცი ისინი იმავე შეცდომის დაშვებას აპირებენ თუ არა, მაგრამ გაორმაგებული მოტივაციით მიიღებს ჩვენი გუნდი სამუშაო ფორმატებში მონაწილეობას“, – აღნიშნა ბუჩუკურმა.
საქართველოს მთავრობამ ევროკომისიის მიერ განსაზღვრული ნაბიჯების შესრულების სამოქმედო გეგმა გაასაჯაროვა. ჩამოთვლილია განსახორციელებელი აქტივობები, ვადები და პასუხისმგებელი უწყებები. გეგმა ევროინტეგრაციის სამთავრობო კომისიამ 27 ნოემბერს დაამტკიცა და ევროკომისიაში გადააგზავნა. 9 პუნქტში საუბარია ევროკავშირისა და მისი ფასეულობების საწინააღმდეგო დეზინფორმაციასთან, გარე საინფორმაციო მანიპულაციებსა და ჩარევასთან ბრძოლაზე ,პოლიტიკური პოლარიზაციის დასაძლევად მუშაობაზე, ასევე, თავისუფალი, სამართლიანი და კონკურენტუნარიანი საარჩევნო პროცესის უზრუნველყოფაზე 2024 წლის არჩევნებისთვის.