არასოდეს გამიგია, რომ ჩინეთის ექსპერტი ყოფილიყოს თინა ხიდაშელი. ზოგადად, განათლებული ქალია და საიდანაც დაფინანსება აქვს, იმ ინტერესებს ემსახურება. ეს ფაქტია, – ამის შესახებ პარლამენტის ვიცე-სპიკერმა გიორგი ვოლსკიმ განაცხადა.
„რაც შეეხება ტაივანის, ის არ არის აღიარებული არც შეერთებული შტატების, არც ევროკავშირის მიერ და ყოველთვის ფართოდ შუქდებოდა მისი და ჩინეთის ურთიერთობების პერიპეტიები, მათ შორის სამომავლო თანამშრომლობის გარკვეული მიმართულებები, რაშიც, რასაკვირველია, საქართველო დაინტერესებულია. აი ამის მონათვლა გარკვეულ ასპექტში, რასაც თინა ხიდაშელი მიჰყვება, არის პოლიტიკური უზნეობა. გარკვეულწილად, შეიძლება პოლიტიკური კორუფცია დავარქვათ. ტაივანიდან იღებს დაფინანსებას, ეს იმას ნიშნავს, რომ ამის წინაპირობა იყო ტაივანის დამოუკიდებლობის მხარდაჭერა, პოლიტიკური ასპექტებიც არის ამაში ჩადებული და რასაკვირველია, პოლიტიკური კორუფცია შეიძლება ამიტომ ვუწოდოთ“, – ამბობს ვოლსკი.
მმართველ გუნდში აცხადებენ, რომ მათი ოპონენტების ნაწილი, რომელიც ჩინეთთან ურთიერთობების გაღრმავებას ეწინააღმდეგება, ტაივანიდან ფინანსდება. მათ შორის ასახელებენ თინა ხიდაშელს. მათივე შეფასებით, ის რომ ხიდაშელის ორგანიზაცია „სამოქალაქო იდეა“ არაღიარებული ქვეყნიდან – ტაივანიდან ფინანსდება, თავდაცვის ყოფილი მინისტრი კი ჩინეთის საწინააღმდეგო განცხადებებს აკეთებს, პოლიტიკური კორუფციის ნიშნების შემცველია. ხიდაშელი „ქრონიკის“ ზარებსა და მოკლეტექსტურ შეტყობინებებს არ პასუხობს.