კარგად გვახსოვს, წინა ხელისუფლების დროს როგორ ქებას ასხამდნენ ნებისმიერი პროექტის განხორციელებას. ჩვენ თუ ვახორციელებთ რამე პროექტს, ეს დანაშაულად, ბოროტებად, კრიმინალად ცხადდება. ორმაგი სტანდარტი გვაქვს, – ამის შესახებ ფონდი „ქართუს“ გამგეობის თავმჯდომარემ, ნიკოლოზ ჩხეტიანმა განაცხადა.
მისივე თქმით, ფონდი „ქართუს“ ნებისმიერ აქტივობასთან დაკავშირებით აწყდებიან კამპანიას, რომელიც დადგმულია და შესაბამისი დამკვეთი ჰყავს.
„რამდენიმე წლის წინ ბიძინა ივანიშვილმა, რომელიც ფონდი „ქართუს“ ძირითადი დონორია, საქართველოში თითქმის მთელი თავისი აქტივები ფონდ „ქართუს“ გადასცა და ფონდი ახორციელებს ამ აქტივების მართვას, საქველმოქმედო პროექტებს. ეს ნიშნავს, რომ ჩვენ ზოგან ვაქირავებთ, ზოგან ვყიდით, ზოგან ვავითარებთ ტერიტორიებს და შემოსულ თანხებს საქველმოქმედო პროექტებში ვიყენებთ. ამით შენდება ობიექტები, რასაც ფონდი საქველმოქმედოდ უკეთებს სახელმწიფოს.
სამი კომპანიის საკუთრებაში რამდენიმე მიწის ნაკვეთი არსებობდა. სამივე კომპანია წარმოადგენს ფონდ „ქართუს“ შვილობილ კომპანიას. კონკრეტული „ქეისიდან“ გამომდინარე, ამ მიწის ნაკვეთების რეალიზაცია გადაწყდა. მავანს დასჭირდა მორიგი ტყუილების კორიანტელის გამოცხობა, ადგილი აქვს ცალსახად პიარულ მეთოდს, გარკვეული ქმედების დემონიზაციას, რადგან საქმე ეხება ბიძინა ივანიშვილს და ქართულ სტრუქტურებს. ეს შეეხება ნებისმიერი სახის ჩვენს აქტივობებს, ძირითადად მშენებლობას. გამოვიდა ისე, რომ მშენებლობა, რაც მსოფლიოში დადებითი პროცესია, ჩვენს შემთხვევაში, ამ უკუღმართ სარკეში, შავი პიარის ნაკადში აღიქმება, როგორც რაღაც დანაშაული და კრიმინალიც კი. ყველას კარგად გვახსოვს, წინა ხელისუფლების დროს როგორ ქებასა და დიდებას ასხამდნენ ნებისმიერი პროექტის განხორციელებას. ორმაგი სტანდარტი გვაქვს – ზოგადად, ვინმე თუ აკეთებს ან თვითონ აკეთებენ, კარგია და თუ ჩვენ ვახორციელებთ რამე პროექტს, ეს დანაშაულად, ბოროტებად, კრიმინალად ცხადდება. ეს არის კიდევ ერთი მკაფიო მაგალითი, რასაც ნებისმიერ ჩვენს აქტივობაში ვაწყდებით და არახალია. ამ კამპანიას, რომელიც აშკარად დადგმული, ორკესტრირებულია, შესაბამისი დამკვეთიც ჰყავს, საკმაოდ კარგად ორგანიზებული ფორმა აქვს და ამ ფორმაში ყველას თავისი როლი, ფუნქცია, ნიშა აქვს. ზოგზოგიერთი წარმომადგენელი თავის ნიშაში ფუნქციონირებს, ამ როლს ძალიან კარგად ასრულებს, ვგულისხმობთ ბატონ შალვა ნათელაშვილს, რომელიც ამ კომიკური პოლიტიკური კომედიის ჟანრში ძალიან წარმატებულია და შევარდნაძის დროიდან მოყოლებული, დღემდე აგრძელებს ამ საქმიანობას, აბსურდული ბრალდებებით ახალისებს ხალხს. ადამიანს ასეთი ფანტაზია რომ აქვს, ალბათ ცალკე უნდა დავაფასოთ“, – განაცხადა ნიკოლოზ ჩხეტიანმა.