საქართველოს პარლამენტის საპროცედურო საკითხთა კომიტეტის თავმჯდომარემ ირაკლი ქადაგიშვილმა „ქრონიკაში“ ოპოზიციური პარტიების შესაძლო გაერთიანებაზე ისაუბრა.
როგორც დეპუტატმა აღნიშნა, ოპოზიციის ლიდერები, რომელთა გარშემო გაერთიანებებზეც დღესაა საუბარი, თავის დროზე „ერთიან ნაციონალურ მოძრაობასთან“ იყო დაკავშირებული, ამიტომ ვერანაირი კონფიგურაცია მათ წარმატებას ვერ მოუტანს.
„ოპოზიცია კრიზისშია, არჩევნები მოადგათ კარს და ცდილობენ რაღაც კონფიგურაცია მოძებნონ. საბოლოო ჯამში, დიდ სურათს თუ შევხედავთ, ესენი არიან ერთ ელექტორატზე მონადირე ხალხი – იმ „ერთიანი ნაციონალური მოძრაობის“ ელექტორატზე მონადირე ხალხი, რომელიც ადრე ერთი დიდი მოძრაობა იყო, დღეს მრავალ სეგმენტად არიან დაშლილნი. მათი გაერთიანებით, ან არ გაერთიანებით, დიდი საერთო სურათი ვერ იცვლება. ისინი ვერ არიან ის „მესამე ძალა“, როგორც ხშირ შემთხვევაში ამბობენ ხოლმე, რომელიც იქნება რაიმე სიახლის მომტანი მოსახლეობისთვის“, – აღნიშნა ქადაგიშვილმა.