როდესაც საკითხი ეხება ტაივანიდან დაფინანსების იდეას, ბუნებრივია, რომ ეს ახდენს გავლენას მიკერძოებასა და მიუკერძოებლობაზე, – ამის შესახებ პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე მიხეილ სარჯველაძემ ჟურნალისტებს თინა ხიდაშელის ორგანიზაციასთან დაკავშირებით განუცხადა.
„როდესაც საკითხი ეხება ტაივანიდან დაფინანსების იდეას, ბუნებრივია, რომ ეს ახდენს გავლენას მიკერძოებასა და მიუკერძოებლობაზე. ეს ალბათ საზოგადოებისთვის საყურადღებო დეტალია. რაც შეეხება საკიტხის შინაარსს, ეს კი აუცილებლად უნდა გავითვალისწინოთ, საქართველოს აქვს საქართველოსთვის სასიცოცხლოდ მნიშვნელოვან ორ საკითხთან დაკავშირებით განსაკუთრებული პოზიცია. პირველი – ტერიტორიული მთლიანობის საკითხი, რომელიც რა თქმა უნდა ნიშნავს, რომ აქ მთავარი არტერია გადის იმაზე, რომ რეალურად, არაღიარების პოლიტიკა იყოს რაც შეიძლება ფართოდ მხარდაჭერილი. მეორე, ეს არის საქართველოსთვის იმ ეკონომიკური ფუნქციის შეძენა, რაც უკავშირდება ე.წ. შუა დერეფნის იდეას“, – აღნიშნა სარჯველაძემ.
თინა ხიდაშელის ორგანიზაცია განცხადებას ავრცელებს და ბოლო დღეებში მის დაფინანსებასთან დაკავშირებით გავრცელებულ ინფორმაციას ეხმაურება. ხიდაშელი ტაივანთან კავშირს ადასტურებს, თუმცა აქვე განმარტავს, რომ ოფიციალური წყაროებიდან დაფინანსება არ მიუღია. ამ ფონზე კი ცნობილია, რომ ფონდი, რომელთანაც თინა ხიდაშელის ორგანიზაცია თანამშრომლობს, ტაივანის ე.წ საგარეო საქმეთა სამინისტროს მიერ არის შექმნილი. ტაივანს კი, ოფიციალური ინფორმაციით, გაეროს წევრი სახელმწიფოების უმეტესობა არ აღიარებს.
საქართველოს პარლამენტის თავმჯდომარემ, შალვა პაპუაშვილმა 19 იანვარს განაცხადა, რომ თინა ხიდაშელი ცდილობს, ანტიჩინური განწყობები გააღვივოს. „მისი ორგანიზაცია ტაივანიდან ფინანსდება, საინტერესოა, როგორც თავდაცვის ყოფილი მინისტრი, როგორ ხედავს ტაივანს და აღიარებს თუ არა ჩინეთის ტერიტორიულ მთლიანობას?“, – განაცხადა პაპუაშვილმა.