საზოგადოებას აღარ სჭირდება იმის გარკვევა, ვინ რას წარმოადგენს. თვითონ არასამთავრობო სექტორი გამოდის და ამბობს, რომ გამარჯობა, მე ვიბრძვი საქართველოს წინააღმდეგო, – ამის შესახებ „ხალხის ძალის“ ერთ-ერთმა ლიდერმა გურამ მაჭარაშვილმა „ქრონიკას“ განუცხადა.
„მაშინ, როდესაც ევროპის საერთაშორისო ინსტიტუტები ბევრ კვლევაში ამბობენ, რომ არა მხოლოდ კანდიდატის მქონე ქვეყნებს, არამედ წევრ ქვეყნებსაც კი უსწრებს საქართველო, საკუთარ ქვეყანაზე „ენჯეოების“ უდიდესი რაოდენობა წერს, რომ ეს ქვეყანა არის ჩამორჩენილი. მინახავს ლუსტრირება, მაგრამ ასეთი ზიზღი საკუთარი ქვეყნის მიმართ გქონდეს, არ მინახავს. „კარგი“ ეს რით არის იცით? საზოგადოებას აღარ სჭირდება იმის გარკვევა, ვინ რას წარმოადგენს. თვითონ არასამთავრობო სექტორი გამოდის და ამბობს, რომ გამარჯობა, მე ვიბრძვი საქართველოს წინააღმდეგო“, – აღნიშნა მაჭარაშვილმა.
სახელისუფლებო გუნდი არასამთავრობო ორგანიზაციების ნაწილს ქვეყნის წინააღმდეგ წარმოებულ ანტისახელმწიფოებრივ კამპანიაში ამხელს. საუბრობენ ევროინტეგრაციის შეფერხების პროცესში მესამე სექტორის როლზე და ამის ერთ-ერთ ბოლო მაგალითად აღმოსავლეთ პარტნიორობის ინდექსის მონაცემებს ასახელებენ, რომლის მიხედვითაც საქართველო მესამე ადგილზე გავიდა. გაირკვა, რომ უცხოელი სპეციალისტები ამ მონაცემების გამოქვეყნებისას საქართველოში მოქმედი არასამთავრობო ორგანიზაციებისგან მიღებულ ინფორმაციებს დაეყრდნენ.