ყველამ ვიცით, რამდენად მნიშვნელოვანი იყო ნახევარფინალი და აუცილებლად უნდა მოგვეგო, რადგან ჩვენი მაყურებლის წინაშე ვთამაშობდით და ასეც მოხდა, – ამის შესახებ ეროვნული ნაკრების წევრმა, ბუდუ ზივზივაძემ, რომელმაც ლუქსემბურგთან მატჩში 2 გოლი გაიტანა, თამაშის დასრულების შემდეგ ჟურნალისტებთან განაცხადა.
„გუნდმა შესანიშნავად ითამაშა. იყო რაღაც ხარვეზები, მაგრამ ეგ ალბათ უფრო ემოციურობისა და ხალხიდან წამოსული მუხტის გამო იყო, რასაც ფინალში, ჩემი აზრით, გამოვასწორებთ. საერთო ჯამში, ძალიან კარგად ვითამაშეთ და ვამაყობ ჩვენი გუნდით. დღეს მე ვიყავი იღბლიანი, რომ ის 2 მომენტი, რომელიც დავასრულე, მე შემექმნა და უბედნიერესი ვარ. გულშემატკივრებს მადლობას გადავუხდი, რადგან ძალიან სწორ მომენტებში, სწორი ენერგია და მუხტი მოდიოდა და ვთხოვ, რომ 26 მარტსაც იგივე გაიმეორონ“, – აღნიშნა ზივზივაძემ.
საქართველოს ნაკრებმა ლუქსემბურგი დაამარცხა და პლეიოფის ფინალში გავიდა. გადამწყვეტი თამაში 26 მარტს, 21:00 საათზე, კვლავ „დინამო არენაზე“ გაიმართება. გამარჯვების შემთხვევაში, ეროვნული ნაკრები ევროპის ჩემპიონატზე პირველად იასპარეზებს.