უკრაინის საგარეო საქმეთა სამინისტრო კატეგორიულად უარყოფს ბრალდებებს „კროკუს სითი ჰოლში“ მომხდარ თავდასხმაში უკრაინის სავარაუდო მონაწილეობის შესახებ, რომელიც გაისმა რუსი ოფიციალური პირებისგან.
“ჩვენ მივიჩნევთ, რომ მსგავსი ბრალდებები კრემლის დაგეგმილი პროვოკაციაა, რომელიც მიზნად ისახავს რუსეთის საზოგადოებაში ანტიუკრაინული ისტერიის შემდგომ გაღვივებას, პირობების შექმნას რუსეთის მოქალაქეების მობილიზაციის გასაძლიერებლად ჩვენი სახელმწიფოს წინააღმდეგ დანაშაულებრივ აგრესიაში მონაწილეობისა და საერთაშორისო თანამეგობრობის წინაშე უკრაინის დისკრედიტაციისთვის”, – ნათქვამია განცხადებაში.
“პუტინის დიქტატურისთვის წითელი ხაზები არ არსებობს. ის მზად არის, მოკლას საკუთარი მოქალაქეები პოლიტიკური მიზნებისთვის, ისევე როგორც უკრაინის წინააღმდეგ ომის დროს ათასობით უკრაინელი მშვიდობიანი მოქალაქე მოკლა სარაკეტო დარტყმების, საარტილერიო დაბომბვისა და წამების შედეგად”, – აღნიშნულია განცხადებაში.
მოსკოვის ოლქის ქალაქ კრასნოგორსკში „კროკუს სითი ჰოლის“ საკონცერტო დარბაზში შეიარაღებულმა პირებმა ცეცხლი გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა.
არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა. რუსეთის უსაფრთხოების ფედერალური სამსახურის (ეფესბე) ინფორმაციით, სავარაუდოდ, დაღუპულთა რაოდენობა 40-ს, დაშავებულთა რიცხვი კი 100-ს აღემატება.
გავრცელებული ინფორმაციით, ტერორისტულ თავდასხმაზე პასუხისმგებლობა დაჯგუფება „ისლამურმა სახელმწიფომ“ აიღო.