ჯგუფ „პიკნიკის“ ერთ-ერთ წევრს, რომელსაც გუშინ „კროკუს სითი ჰოლში“ კონცერტი უნდა გაემართა, ამ დრომდე ვერ უკავშირდებიან. ამის შესახებ ჯგუფის დირექტორმა იური ჩერნიშევსკიმ განაცხადა.
„ჯგუფის ერთ-ერთი მონაწილის ადგილსამყოფელი ამ დრომდე უცნობია. უშუალოდ ჩვენ სროლის ფაქტს არ შევსწრებივართ, მალევე გაგვიყვანეს შენობიდან. დარბაზში დარჩა ჩვენი აპარატურა, ტექნიკა და ა.შ., მაგრამ ეს არ გვადარდებს. ყველაზე მთავარი ადამიანების სიცოცხლე და ჯანმრთელობაა“, – აღნიშნა ჩერნიშევსკიმ.
მოსკოვის ოლქის ქალაქ კრასნოგორსკში „კროკუს სითი ჰოლის“ საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა.
არსებული ინფორმაციით, თავდამსხმელებმა ასევე ააფეთქეს ხელყუმბარა, რის გამოც ხანძარი გაჩნდა. რუსეთის საგამოძიებო კომიტეტის წინასწარი მონაცემებით „კროკუს სითი ჰოლში“ ტერაქტის შედეგად დაღუპულთა რიცხვმა 60-ს გადააჭარბა.
გავრცელებული ინფორმაციით, ტერორისტულ თავდასხმაზე პასუხისმგებლობა დაჯგუფება „ისლამურმა სახელმწიფომ“ აიღო. რაც შეეხება თავდამსხმელებს, საგამოძიებო კომიტეტში აცხადებენ, რომ ამ საკითხზე საუბარი ამ ეტაპზე ნაადრევია.