“შოკირებულები ვართ საშინელი კადრებით მოსკოვიდან სადაც ტერაქტს უდანაშაულო ადამიანები ემსხვერპლნენ”

ნიდერლანდების პრემიერ-მინისტრი მარკ რუტე სოციალურ ქსელში მოსკოვის ოლქის ქალაქ კრასნოგორსკში, „კროკუს სითი ჰოლის“ საკონცერტო დარბაზში მომხდარ ტერაქტს ეხმიანება.

„შოკირებულები ვართ საშინელი კადრებით მოსკოვიდან, სადაც უდანაშაულო ადამიანები ემსხვერპლნენ ტერაქტს, რომელზეც პასუხისმგებლობა „ისლამურმა სახელმწიფომ“ აიღო. ფიქრებით დაღუპულთა ოჯახებთან და რუს ხალხთან ვარ“, – წერს მარკ რუტე.

მოსკოვის ოლქის ქალაქ კრასნოგორსკში „კროკუს სითი ჰოლის“ საკონცერტო დარბაზში შეიარაღებულმა პირებმა ცეცხლი 22 მარტს გახსნეს. თვითმხილველის განცხადებით, ინციდენტი ჯგუფ „პიკნიკის“ კონცერტის დაწყებამდე მოხდა – დარბაზის პარტერში სულ მცირე სამი შეიარაღებული პირი შეიჭრა და ავტომატებიდან ცეცხლი გახსნა.