ეს არის საქართველოს ევროპული გაზაფხული, – ასე გამოეხმაურა საპარლამენტო უმრავლესობის ლიდერი არჩილ თალაკვაძე საქართველოს მოქალაქეებისთვის ვიზალიბერალიზაციის შესახებ გადაწყვეტილების ხელმოწერას, რომელიც ევროპარლამენტში დღეს გაიმართა.
„ეს არის აღიარება იმ დემოკრატიული რეფორმების და გარდაქმნების, რომელიც შეუქცევადია და რომელსაც ახორციელებს ხელისუფლება საზოგადოების მხარდაჭერით. ეს არის ახალი შესაძლებლობები ეკონომიკური, პოლიტიკური და კულტურული თვალსაზრისით და, რა თქმა უნდა, ეს არ არის ჩვენთვის ბოლო წერტილი ევროკავშირთან ურთიერთობაში. იცით, რომ ვიზალიბერალიზაციის სამოქმედო გეგმის წარმატებით განხორციელება დაიწყო და დასრულდა ჩვენი ხელისუფლების პირობებში, რასაც მოჰყვა უვიზო რეჟიმის შესახებ გადაწყვეტილება. ჩვენ ასევე ხელმოწერილი გვაქვს ასოცირების ხელშკერულება ევროკავშირთან, რომლის განხორციელებასაც გავაგრძელებთ თანმიმდევრულად და დიდი მოტივაციით. დღეიდან დაახლოებით 20 დღეში საქართველოს მოქალაქეები შევძლებთ უკვე უვიზოდ მგზავრობას შენგენის ქვეყნებში, თუმცა ეს ასევე ნიშნავს, რომ თითოეული მოქალაქე, რომელიც ევროკავშირის წევრ ქვეყანაში შევა, დღეიდან ბევრად უფრო მეტად ხდება თავისი ქვეყნის ელჩი ევროპაში, ამიტომ ჩვენ ძალიან ფრთხილად და პატივისცემით უნდა მოვეპყრათ ამ მხარდაჭერას და ევროპელების არჩევანს, რომ საქართველოს მისცენ მეტი შესაძლებლობა ევროპის დიდ ოჯახში ინტეგრაციისთვის“, – განაცხადა თალაკვაძემ.
მისივე თქმით, შემთხვევითი არავის უნდა ეგონოს ის, რომ ვიზალიბერალიზაციის გადაწყვეტილებას დროში ემთხვევა სერიოზული გარღევევა საქართველოს ეკონომიკაში – 5,2%-იანი ეკონომიკური ზრდა, ტურისტული ნაკადის ზრდა, ახლად რეგისტრირებული საწარმოების შექმნის მაჩვენებლის 30%-იანი ზრდა და ა.შ. „იმ ფონზე, როდესაც ჩვენ უკვე ევროკავშირის ასეთი მხარდაჭერა გვაქვს, ბუნებრივია, საქართველო ისე, როგორც არასდროს ხდება მიმზიდველი ინვესტორებისთვის; ისე, როგორც არასდროს ხდება საიმედო ჩვენი მოკავშირე ქვეყნებისთვის; ეს ყველაფერი სინერგიაში ჩვენ მოგვცემს უკვე კიდევ უფრო მდგრად ეკონომიკურ განვითარებას და, რაც მთავარია, საერთო ჯამში შესაძლებობას, რომ წარმატებით განხორიცელდეს მთავრობის 4-პუნქტიანი გეგმა“, – განაცხადა თალაკვაძემ.
საქართველოს მოქალაქეებისთვის ევროკავშირის/შენგენის წევრ ქვეყნებში უვიზო მიმოსვლის შემოღებასთან დაკავშირებულ რეგულაციას ბრიუსელში ხელი ოფიციალურად მოეწერა. ცვლილება რეგულაციაში, რომელიც საქართველოს მოქალაქეებისთვის ევროკავშირის/შენგენის წევრ ქვეყნებში უვიზო მიმოსვლის შემოღებას ითვალისწინებს, ევროკავშირის საბჭომ 27 თებერვალს დაამტკიცა. განახლებული რეგულაცია რამდენიმე დღეში ოფიციალურ ჟურნალში გამოქვეყნდება. გამოქვეყნებიდან 20 დღის ვადაში კი, საქართველოს მოქალაქეები ევროკავშირის/შენგენის წევრ ქვეყნებში მოკლევადიანი ვიზიტით უვიზოდ გამგზავრებას შეძლებენ.