მამუკა მდინარაძე ყველას მოუწოდებს, საკონსტიტუციო ცვლილებებთან დაკავშირებით საზოგადოება შეცდომაში არ შეიყვანოს.
ასე პასუხობს საპარლამენტო უმრავლესობის ერთ-ერთი ლიდერი მამუკა მდინარაძე პრეზიდენტის განცხადებას, რომელმაც აღნიშნა, რომ ”საკონსტიტუციო კომისიის მიერ არა კონსტიტუციის შინაარსობრივ გადახედვასთან გვაქვს საქმე, არამედ საუბარია კონკრეტულ პოლიტიკოსთან დაკავშირებული გადაწყვეტილების მიღებაზე”.
”სწორედაც რომ ერთ კაცზე მორგებულ კონსტიტუციას ვცვლით ამ რეფორმით და ეს წარსულიდან ყველას ძალიან კარგად გვახსოვს. რაც შეეხება მოქმედ პრეზიდენტს, ჩვენი ვერსიის თანახმად, მას კვლავ შეუძლია მიიღოს მონაწილეობა საპრეზიდენტო არჩევნებში. მესამედ კენჭისყრა კი ამჟამინდელი რედაქციითაც შეუძლებელია. სად არის ლოგიკა, რომ მის წინააღმდეგ არის მიმართული ეს ვერსია? – ყველას ვთხოვ, ნუ ეცდებიან საზოგადოების შეცდომაში შეყვანას. ნებისმიერ იურისტს დაუსვან შეკითხვა – საპარლამენტო რესპუბლიკის მოწყობაში პრეზიდენტის ლეგიტიმაციის ხარისხის შესახებ”, – განუცხადა მამუკა მდინარაძემ ”ინტერპრესნიუსს”.
დეპუტატის თქმით, თეორიულადაც რომ იქნას დაშვებული, რომ გიორგი მარგველაშვილის წინააღმდეგ არის მიმართული აღნიშნული ცვლილებები, „მაშინ რატომ ჩაიწერებოდა, რომ შემდეგი საპრეზიდენტო არჩევნები პირდაპირი წესით იყოს არჩეული?“.
”მოქმედ რედაქციაში მისი უფლებები პრაქტიკულად მინიმუმამდეა დასული, მისი უფლებები და ლეგიტიმაცია აშკარა შეუსაბამობაშია და იურიდიული ლოგიკიდან არ გამომდინარეობს. ერთადერთი, რაც შეიძლება მწვავე საკითხად იყოს განხილული, ის არის, რომ იუსტიციის საბჭოს ჰქონდეს მოსამართლის არჩევის უფლებამოსილება და არა პრეზიდენტს, თუ ჩვენ ვსაუბრობთ საპარალამენტო მოწყობის რესპუბლიკაზე, სადაც პრეზიდენტი ასრულებს მხოლოდ და მხოლოდ არბიტრის როლს და ის არ არის რომელიმე შტოს ხელმძღვანელი ან წარმომადგენელი ხელისუფლებისა და თუ ვსაუბრობთ იმაზე, რომ სასამართლოს დამოუკიდებლობის ხარისხი უნდა გაიზარდოს, მაშინ იურიდიული ლოგიკიდანაც გამომდინარეობს ეს ყველაფერი. ლოგიკა არ არსებობს საერთაშორისო პრაქტიკიდანაც”, – აღნიშნა მდინარაძემ.
რა გადაწყვეტილებისკენაც მიდის საკონსტიტუციო კომისია პრეზიდენტის არჩევითობასთან დაკავშირებით, ჩემთვის დასანანია, – ამის შესახებ საქართველოს პრეზიდენტმა გიორგი მარგველაშვილმა პრესკონფერენციაზე განაცხადა, სადაც პრეზიდენტის არჩევის წესთან დაკავშირებით საკონსტიტუციო კომისიაში გაჟღერებულ პოზიციებს გამოეხმაურა.
როგორც პრეზიდენტმა აღნიშნა, ნათლად დაფიქსირდა, რომ საკონსტიტუციო კომისიაში არა კონსტიტუციის შინაარსობრივ და სიღრმისეულ გადახედვასთან გვაქვს საქმე, არამედ საუბარია კონკრეტულ პოლიტიკოსთან დაკავშირებული გადაწყვეტილების მიღებაზე.