საქართველოს მთავრობა არაფრის საქმის კურსში არ იყო, ვინ ჰკითხავს სებასტიან კურცს?! – ამის შესახებ ექსპერტმა მამუკა არეშიძემ ავსტრიის საგარეო საქმეთა მინისტრის, სებასტიან კურცის მოსაზრებაზე განაცხადა.
„თურქეთი აშანტაჟებს ევროპას. როგორც შარშან გამოყარა ლტოლვილები თავისი ტერიტორიიდან, წელსაც იგივეს გაიმეორებს. 2 მილიონი სირიელი ლტოლვილი ცხოვრობს თურქეთში და თუ გამოყარეს, ეს ხალხი ხომ უნდა წავიდეს სადღაც? – ამიტომ კურცმა ჩამოთვალა სწორედ ის ქვეყნები, რომელიც ტერიტორიულად ახლოსაა თურქეთთან: დასავლეთ ბალკანეთის ქვეყნები ეკვრის თურქეთს, ეგვიპტე ახლოსაა, ხოლო საქართველო მეზობელია თურქეთის. ასევე, ეს ქვეყნები დასავლეთის მოკავშირე და მასთან კავშირის მსურველი ქვეყნებია. ვურჩევ, ავსტრიაში გააკეთონ ბანაკები, უფრო დიდი ქვეყანაა, უფრო კარგად განვითარებული და დევნილები და ლტოლვილებიც ნაკლები ჰყავს“, – განაცხადა მამუკა არეშიძემ.
მამუკა არეშიძემ დასძინა, რომ საქართველოს ხელისუფლებამ არავითარ შემთხვევაში არ უნდა დაუშვას სირიელი ლტოლვილებისთვის საქართველოში ბანაკის მოწყობა.
ექსპერტი ფიქრობს, რომ ამ საკითხს რუსეთი „თავისებურად“ გამოიყენებს.
„ჩვენ გვყავს უამრავი ლტოლვილი, გვაქვს დიდი ბანაკი მარტყოფში, სადაც აქვე მეორე ბანაკის მშენებლობას ამთავრებს გაერო. მთელი საქართველო ხომ ვერ იქცევა დევნილებისა და ლტოლვილების განთავსების ადგილად? გამორიცხულია! თუ იქამდე მივიდა საქმე, რომ ევროპელები იტყვიან, ფულს გადავიხდით და შევინახავთ ინფრასტრუქტურას, ეს არავითარ შემთხვევაში ჩვენთვის არ არის მისაღები. ჩვენ დღეს დაახლოებით 1 000 მდე კაცი გვყავს მიღებული სირიიდან და ერაყიდან. უკვე კრიტიკული მასა შეიქმნა ამ ხალხის.
საქართველოში არის უმძიმესი დემოგრაფიული მდგომარეობა. მე-19 საუკუნის 30-იან წლებში საქრათველოში ლტოლვილების მიღებით შეიცვალა დემოგრაფიული სიტუაცია. აქედან გამომდინარე, ამის გაკეთება არავითარ შემთხვევაში არ შეიძლება, კურცი კი არა, მამა ღმერთიც რომ იყოს.
საფრთხეები არის დემოგრაფიული, სოციალური, ეკონომიკური და პოლიტიკური კუთხით. ეს ეჭვიანობის საბაბს ყველას აძლევს, რუსეთს მათ შორის. რუსეთი ფიქრობს, რომ ეს იქნება არა ლტოლვილების, არამედ მოჯაჰედების მომზადების ბანაკი. აუცილებლად მოინდომებს რუსეთი ამ ამბის ამგვარად შეფუთვას“, – განაცხადა არეშიძემ.