მხოლოდ და მხოლოდ გიორგი მარგველაშვილის, მისი ადმინისტრაციისა და ”ნაციონალური მოძრაობის” წარმომადგენლების მხრიდან გახდა ჩემი განცხადება სპეკულაციების საგანი, ყველა დანარჩენი მიხვდა, რას ვგულისხმობდი, – ამის შესახებ ტელეკომპანია ”რუსთავი 2“-ის ეთერში საქართველოს პარლამენტის თავმჯდომარემ ირაკლი კობახიძემ განაცხადა.
პარლამენტის თავმჯდომარემ განმარტა 5 მარტს მის მიერ გაკეთებული განცხადება, რომ ”თუ პრეზიდენტი გააგრძელებს არაკორექტული განცხადებების გაკეთებას, შეიძლება ვიფიქროთ, რომ მომავალ წელს არაპირდაპირ არჩევნებზე გადავიდეთ”.
მისი თქმით, საკონსტიტუციო კომისია განიხილავს არაპირდაპირ საპრეზიდენტო არჩევნებზე გადასვლას, თუმცა, იქიდან გამომდინარე, რომ ვინმემ არ ჩათვალოს, თითქოს ეს ცვლილება ემსახურება პრეზიდენტ მარგველაშვილისთვის უფლების არ მინიჭებას შემდგომ საპრეზიდენტო არჩევნებში, მმართველი გუნდის პოზიციაა, რომ 2018 წლის არჩევნები ჩატარდეს პირდაპირი წესით, ამის შემდგომი არჩევნები კი არაპირდაპირი წესით.
კობახიძის განმარტებით, მისი 5 მარტის განცხადება ეხებოდა იმას, რომ თუ მმართველი გუნდის ამ პოზიციის შემხვედრი ნაბიჯი იქნება არაკორექტული, ამ შემთხვევაში უმჯობესია პირდაპირ გადასვლა არაპირდაპირ არჩევნებზე, რომელიც ყველაზე უკეთ ემსახურება ქვეყნის გრძელვადიანი განვითარების ინტერესებს.
”საკონსტიტუციო კომისიაში განვიხილეთ პრეზიდენტის არჩევის წესი. განიხილებოდა არაპირდაპირ წესზე გადასვლა, ოღონდ არა შემდეგ, არამედ იმის შემდეგ არჩევნებზე. პირდაპირი და არაპირდაპირი არჩევის წესიც არის ერთნაირად დემოკრატიული და ერთნაირად მოქმედებს დემოკრატიულ ქვეყნებში. ჩვენ გვქონდა საუბარი იმაზე, თუ რა გრძელვადიანი ხედვა გვაქვს კონსტიტუციასთან დაკავშირებული, კონსტიტუცია უნდა იცვლებოდეს გრძელვადიანი ხედვის საფუძველზე და არ უნდა იყოს კონკრეტულ სუბიექტებზე მორგებული. თუმცა კომისიაზე გაჟღერდა ასეთი პოზიცია – ვინმემ რომ არ ჩათვალოს, რომ ამ შემთხვევაში ეს ცვლილება ემსახურება პრეზიდენტ მარგველაშვილისთვის უფლების არ მინიჭებას, რომ კენჭი იყაროს შემდეგ არჩევნებში, ხომ არ გაგვეკეთებინა ასეთი რამ: ჯერ ჩავატაროთ პირდაპირი არჩევნები და შემდეგ გადავიდეთ არაპირდაპირ არჩევნებზე. შემოვიდა პერსონალური ფაქტორი მსჯელობაში. პერსონალური ფაქტორის გათვალისწინებით, რომ არავის ჰქონოდა იმის თქმის საფუძველი, რომ რამე კეთდება მოქმედი პრეზიდენტის საწინააღმდეგოდ, ჩვენ შევთავაზეთ კომისიას ასეთი რამ: კი გვაქვს გრძელვადიანი ხედვა, ჩამოვყალიბდეთ იმაზე, რომ გადავდივართ ამ სისტემაზე თავისი არაპირდაპირი არჩევნებით, თუმცა ვიზიარებთ კომისიის წევრთა შესაბამის მოსაზრებას და აქედან გამომდინარე, შეიძლება მიზანშეწონილი იყოს 2018 წლის საპრეზიდენტო არჩევნების პირდაპირი წესით ჩატარება. დიპლომატებთანაც გვქონდა შეხვედრა და იქაც გაჟღერდა ასეთი რამ, რომ გრძელვადიანი ხედვა კარგია, მაგრამ პერსონალური ფაქტორის გათვალისწინებით იქნებ 2018 წელს ჩატარდეს პირდაპირი არჩევნები. ეს გავითვალისწინეთ. ამოცანა აქ არის, რომ სპეკულირება არ უნდა გაგრძელდეს ამ თემებზე. ჩემი განცხადება ეხებოდა იმას, რომ თუ სპეკულირება მაინც უნდა გაგრძელდეს, თუ ჩვენ კორექტულ მიდგომას არაკორექტული მიდგომა უნდა დახვდეს, ამ შემთხვევაში ჩვენ პირდაპირ გადავალთ იმ სისტემაზე, რომელიც ჩვენი აზრით ყველაზე უკეთ ემსახურება ჩვენი ქვეყნის გრძელვადიანი განვითარების ინტერესებს. ძალიან მკაფიოდ ითქვა ეს ჩემი მხრიდან”, – განაცხადა კობახიძემ.