როგორც კი გასცდება პროტესტი დასაშვებ ფარგლებს და მიიღებს ძალადობრივ ხასიათს, პოლიცია ვალდებულია, იმოქმედოს, – განაცხადა შინაგან საქმეთა მინისტრის მოადგილემ ალექსანდრე დარახველიძემ სამინისტროში გამართულ ბრიფინგზე.
„ჩვენი გეგმა გაწერილია საქართველოს კონსტიტუციაში და კანონებში, რომლებითაც ვმოქმედებთ – შეკრებისა და მანიფესტაციების შესახებ კანონი, პოლიციის შესახებ კანონი, რომელიც გვავალდებულებს, რომ თუკი შეკრება, მანიფესტაცია არის მშვიდობიანი, სახელმწიფომ უნდა გააკეთოს ყველაფერი იმისათვის, რომ თითოეულ მონაწილეს ჰქონდეს პროტესტის თავისუფლად გამოხატვის საშუალება. მაგრამ როგორც კი გასცდება ეს პროტესტი დასაშვებ ფარგლებს, კერძოდ მიიღებს ძალადობრივ ხასიათს, განხორციელდება შენობის შესასვლელების ბლოკირება, ინდივიდუალური თავდასხმები პირებზე, რა თქმა უნდა, პოლიცია ვალდებულია, იმოქმედოს. შესაბამისად, ეს არის ჩვენი გეგმა, ასე ვმოქმედებთ უკვე დიდი ხანია, ასე ვმოქმედებთ ბოლო დღეების განმავლობაში და რა თქმა უნდა, ასე გავაგრძელებთ მუშაობას“, – განაცხადა ალექსანდრე დარახველიძემ.