ჩვენი სუვერენიტეტის ნაწილს დიდწილად ვთმობთ, მაგრამ ჩვენ არ გვინდა, რომ ეს ჩვენი სუვერენიტეტის დათმობა 100%-იანად მოხდეს, – განაცხადა „დღის ქრონიკაში“ პარლამენტის ვიცე-სპიკერმა ნინო წილოსანმა ევროკავშირში გაწევრიანების პროცესზე საუბრისას.
მისი განცხადებით, როდესაც ქვეყანა ევროკავშირის წევრი ხდება, თავისი სუვერენიტეტის დიდ ნაწილს თმობს.
„ეს ნიშნავს, რომ უნდა შეუერთდე ისეთ კანონმდებლობას და ისეთ პრინციპებს, რომლებიც ევროკავშირში მუშაობს და ამ წლების მანძილზე ჩვენი მხრიდან განხორციელებული რეფორმები ზუსტადაც ამის ასახვა იყო. ბევრი ის პრინციპი, რომელიც გადმოვიღეთ ასოცირებიდან გამომდინარე, გარკვეულწილად იყო სხვადასხვა ჯგუფისთვის მათი პრიორიტეტების დათმობის წინაპირობა. ამაზე გაცილებით მეტი იქნება, როდესაც ჩვენ უკვე წევრები გავხდებით ევროკავშირის და საქართველო ვალდებული იქნება, რომ ევროკავშირის მთლიან ამ სისტემაში ჰარმონიულად მოექცეს. რა თქმა უნდა, ჩვენი სუვერენიტეტის ნაწილს დიდწილად ვთმობთ, მაგრამ ჩვენ არ გვინდა, რომ ეს ჩვენი სუვერენიტეტის დათმობა 100%-იანად მოხდეს”, – განაცხადა ნინო წილოსანმა.
მან ასევე აღნიშნა, რომ ქვეყანა ღირსეულად უნდა იყოს წარმოდგენილი ევროკავშირში.
„ჩვენ გვსურს, რომ ქვეყანა იყოს ღირსეულად წარმოდგენილი და გვქონდეს უფლება, ვიცოდეთ, დაფინანსება, რომელიც ჩვენ ქვეყანაში შემოდის. რიგ შემთხვევაში პირდაპირ კანონის დარღვევასთან გვაქვს საქმე, რომ ეს უცხოური დაფინანსება მონაწილეობს პოლიტიკური პარტიების დაფინანსებაში. ეს პირდაპირ იკრძალება, ეს არის ანბანი სახელმწიფოებს შორის ურთიერთობებში და ზოგადად, ქვეყნის სუვერენიტეტის, რომ ქვეყნის შიდა პოლიტიკა არ შეიძლება ფინანსდებოდეს უცხო ქვეყნების მხრიდან, რადგან ეს არის გარედან შემოსული ძალის ზემოქმედება შენს შიდა საქმეებზე. ამგვარ შემთხვევებს რომ ვხედავთ, ჩვენ ძალიან მყარად ვდგავართ ჩვენი სუვერენიტეტის და ჩვენი ქვეყნის ინტერესების დასაცავად”, – განაცხადა ნინო წილოსანმა.