კარგი იქნებოდა პრეზიდენტს გადაეხედა თავისი გადაწყვეტილებისთვის და მონაწილეობა მიეღო სახელმწიფო საკონსტიტუციო კომისიის მუშაობაში, – ასე შეაფასა პარლამენტის ვიცე სპიკერმა ზვიად ძიძიგურმა პრეზიდენტის ინციატივა, რომელიც საკონსტიტუციო ცვლილებებთან დაკავშირებით სახლხო განხილვების დაწყების საკითხს ეხება.
,,საჯარო განხილვების თემა, რომელიც პრეზიდენტმა დააანონსა, ჩემთვის გაუგებარია. რომელი პროექტის საჯარო განხილვები იწყება?! არც პრეზიდენტს წარმოუდგენია რამე თავისი ვერსია და არც სახელმწიფო საკონსტიტუციო კომისიას დაუსრულებია თავის ვერსიაზე მუშაობა.
პრეზიდენტის ინიციატივა ერთგვარად ცუდ შემოქმედებას ჰგავს. ვნახოთ, როგორ და რა ვითარებაში განვითარდება მოვლენები. ვისურვებდი, რომ პრეზიდენტმა, რომელმაც უარი განაცხადა სახელმწიფო საკონსტიტუციო კომისიაში მუშაობაზე, გადახედოს თავის გადაწყვეტილებას. ერთი რამ ვიცი, რომ კონსტიტუციის ცვლილებები არის ძალიან საიმედო ხელში და თუ ვინმე ეჭვის თვალით უყურებს ამ კომისიის მუშაობას, ჯერ გვაცადონ, რომ პროდუქტი დავდოთ თუ რა ცვლილებებზეა საუბარი და ამის შემდეგ გამოთქვან ეჭვი. ჯერ ბავშვი არ დაბადებულა და აბრაამს არქმევდნენო – არ არის საჭირო ასეთი მიდგომა, მით უმეტეს ისეთი სერიოზული ინსტიტუტის მხრიდან, როგორიც პრეზიდენტის ინსტიტუტია“, – განაცხადა ზვიად ძიძგურმა.