ტელეკომპანია „იმედის“ გენერალური დირექტორის მოადგილე, გადაცემა „იმედის კვირის“ წამყვანი ირაკლი ჩიხლაძე ქვეყნის სხვადასხვა ქალაქში მოწყობილ 17 მაისის მსვლელობას გადაცემაში გამოეხმაურა.
„ბევრი ვიფიქრე როთი დამეწყო დღევანდელი ეთერი, რა მეთქვა შესავალ ტექსტში ისეთი, რაც ზუსტად აღწერდა პოლიტიკურ კვირას – ბოლოს მივხვდი, რომ ვერაფერს იმაზე უკეთ ვერ ვიტყვი ვიდრე კადრები ამბობს.
17 მაისს ერმა და ბერმა საქართველოს დასაცავად თავისი სათქმელი მკაფიოდ და ღირსებით კიდევ ერთხელ თქვა…
მე არასოდეს ვამბობ, სად რამდენი ადამიანი დგას, არ ვითვლი თავებს, რადგან ზუსტად ვიცი, რომ არ ვიქნები მართალი და ეს ჩემი მხრიდან იქნება საკითხით სპეკულაცია, რადგან ამ საკითხში ზედმეტად არაკომპეტენტური ვარ და არც ჩემი ვალდებულებაა, მაგრამ 17 მაისის კონტექსტში დავუშვებ მცირე გამონაკლის, სხვადასხვა წყაროს მიერ გავრცელებული ინფორმაციით ვისარგებლებ და გეტყვით, რომ მხოლოდ თბილისში 300 000 ზე მეტი ადამიანი მონაწილეობდა სადღესასწაულო მსვლელობაში, ასევე სხვა და სხვა წყაროზე დაყრდნობით გეტყვით, რომ რეგიონებში ქუჩაში გამოსული ადამიანების რიცხვმა 200 ათას გადააჭარბა.
ეს არის პასუხი ყველაფერზე – პირველ რიგში, პასუხი მართლმადიდებლური ქვეყნის იმ ადამიანების მიმართ, რომლებიც მეგობრობის ხელს გვიწვდიან და სტუმრობისას ჩვენსავე სახლში ჩვენსავე ქვეყანაში ჩვენს ეკლესიას შეურაცხყოფენ და აკნინებენ…
მიხაილ როთი – ბუნდესტაგის საგარეო ურთიერთობების კომიტეტი, თქვა ის რაც ჩემთვის, როგორც ერთ რიგითი მოქალაქისთვის სრულიად დაუჯერებელია, ბევრჯერ მოვუსმინე, რომ საბოლოოდ ჩემი დასკვნა და ჩემი აღქმები მქონოდა.
ფაქტია, როთმა ეს თქვა იმ ადამიანების წასახალისებლად, რომლებიც 24 საათი საპატრიარქოს, პატრიარქსა და ეკლესიას ესხმიან თავს..
უპატივცემულობის ღია მაგალითია ისიც, საქართველოში სტუმრად მყოფი სხვა ქვეყნის, ამ შემთხვევაში ლიეტუვის საგარეო საქმეთა მინისტრი ანტისახელისუფლებო მიტინგის სცენიდან მოგმართავდეს და თითის ქნევით გესაუბრებოდეს.
დეტალურად განვიხილოთ ე.წ მეგობრების დამოკიდებულება, საგარეო საქმეთა მინისტრების თუ კომიტეტების თავმჯდომარეების საქართველოში ვიზიტი და ყოველგვარი ინტერპრეტაციების გარეშე თავად გააკეთეთ დასკვნა – ვინ ცდილობს მეგობრის სტატუსით შიდა პოლიტიკაში ჩარევას“, – განაცხადა ირაკლი ჩიხლაძემ.