“მინდა, პოლიციას მადლობა გადავუხადო. პოლიცია არის განახლების პროცესში და ეს არის იდეური განახლება. პოლიცია არ არის პოლიტიზირებული. ის არ ემსახურება კონკრეტულ პოლიტიკურ პარტიას ან პოლიტიკოსს. პოლიცია იცავს კანონს და ჩვენს ქვეყანას, ჩვენი ქვეყნის მოქალაქეებს და მათ უფლებებს,” – განაცხადა საქართველოს ვიცე-პრემიერმა კახა კალაძემ “იმედის დროსთვის” მიცემულ ინტერვიუში.
“ჩვენ ხელისუფლებაში არ მოვსულვართ იმისთვის, რომ რაიმე გვესწავლა. ჭკვიანი ადამიანი სხვის შეცდომებზე სწავლობს. გუშინ პოლიციის ქმედება იყო აბსოლუტურად ზომიერი, მნიშვნელოვანი იყო მათი ქმედებები ზუსტად იმ დროს, როდესაც ამის საჭიროება და აუცილებლობა იყო. მინდა ხაზგასმით აღვნიშნო ის, რომ ვერავინ გაბედავს, ქვეყანაში არეულობის მოწყობას. კარგად გვახსოვს 90-იანების მძიმე წლები, რა გამოიარა ქვეყანამ, რას ნიშნავს ურთიერთდაპირისპირება და სისხლის ღვრა. ეს ჭრილობები ჯერაც არ მოუშუშებია საზოგადოებას. არავის მივცემთ იმის უფლებას და იმის საშუალებას, რომ ქვეყანაში დაპირისპირება, ხელისუფლების გადატრიალება და დამხობა მოაწყოს.
ჩვენ მართალი ვართ და ყველა გამოწვევას ღირსეულად ვუპასუხებთ“, – განაცხადა კახა კალაძემ.