საპარლამენტო უმრავლესობის ლიდერი არჩილ თალაკვაძე ბათუმში განვითარებულ მოვლენებს აფასებს. მისი განცხადებით, პროცესებში აშკარად იკვეთება „ნაციონალური მოძრაობის“ ჩართულობის კვალი.
“ნაციონალური მოძრაობა”, რომელსაც ნიკა მელია წარმოადგენს, ნამდვილად აღარ არის გუშინდელი მოვლენების მერე ჩვენი ოპოზიცია, ეს არის უკვე ქვებით შეიარაღებული, ქუჩაში მორბენალი ჯგუფი და მათ მოუწევთ სრული პასუხისმგებლობის აღება. ის რომ, ეს იყო მათი დღის წესრიგის ნაწილი, დასტურდება რამდენიმე მყარი არგუმენტით. ჩვენ უნდა გავიხსენოთ, რატომ გაიყო ნაცმოძრაობა ორ ნაწილად, გაიყო იმიტომ რომ ბატონი ნიკა მელიას დაჯგუფება ზუსტად იყო მომხრე ქვეყანაში დესტაბილიზაციის, რევოლუციური სცენარების და ეს ინფორმაცია ცნობილია საზოგადოებისათვის“, – განაცხადა არჩილ თალაკვაძემ “მოამბის” პირდაპირ ეთერში.
არჩილ თალაკვაძის განცხადებით, ფაქტი რომ “ნაციონალურმა მოძრაობამ” სოლიდარობა გამოუცხადა აქციის მონაწილეებს და მსგავსი აქციები დაანონსა საქართველოს მასშტაბით, უკვე ადასტურებს მათ ჩართულობას პროცესებში.
“ჩვენ თუ ამოვიღებთ გუშინდელ ვიდეომასალას, იქ აშკარად ჩანს, რომ ნაცმოძრაობის ლიდერები პირდაპირ მონაწილეობდნენ იმ ვანდალიზმში, რაც გუშინ ბათუმის ქუჩებში ხდებოდა. მათ გამოუცხადეს სოლიდარობა და დაანონსეს მსგავსი შეკრებები საქართველოს მასშტაბით და მათთან ასოცირებული სატელიტი ორგანიზაციების წარმომადგენლები აქტიურად იყვნენ ჩართულები ამ პროცესში. მინიმუმ ეს არგუმენტები უკვე ადასტურებს, რომ ისინი ჩართულები იყვნენ ამ პროცესში. თუ რა როლი ჰქონდათ, რა დოზით აორგანიზებდნენ და რამდენად თვითონ მონაწილეობდნენ ძალადობაში, ამას დაადგენს გამოძიება. თუმცა პოლიტიკური შეფასება რომ გავაკეთოთ ცხადია, რომ ნიკა მელიას დაჯგუფება, ძველი ნაცმოძრაობა შეინიშნება რომ ჩართული იყო ამ პროცესში”, – განაცხადა არჩილ თალაკვაძემ.